KHAWTHLIR

Computer zirna
MHIP sub-headquarters office, Kolasib-a a thlawna computer zirna chu nimin khan bialtu MLA PC Zoram Sangliana'n a hawng. MLA chuan, tunlai khawvelah computer leh information technology thiam a pawimawh thu sawiin, "Computer thiam lo chu hna chi hrang hrangah chhawrna tur an tlem," a ti. Computer hi darkar khatah mi 20-in an zir thei dawn a, ni khatah mi 100 hnenah zirtirna pek ṭhin a ni ang.

NLUP sem
Commerce & Industries department chuan nimin khan Lunglei Bazar Veng community hall-ah NLUP ṭanpuina an sem. NLUP semna inkhawm hmanpuitu Chalrosanga Ralte, Lunglei West bialtu MLA chuan, hlawhtling tura theihtawp chhuah chu NLUP ṭanpuina dawngtute mawhphurhna a nih thu a sawi. Ṭanpuina hi mi 157 hnenah Rs. 46,72,000 sem a ni.

Thisen pe
Republic Vengthlang ṬKP unit chuan nimin khan blood donation camp an huaihawt a, Aizawl Civil Hospital tan mipa 20 leh hmeichhia 11-te'n thisen unit 31 an pe.

SIPMIU sawiho
UDPA department leh SIPMIU, Aizawl chuan nimin khan Aijal Club-ah an hnathawhte zirchianna leh sawihona hun an buatsaih a; SIPMIU project director Valbuanga,'n kaihruaiin, DSMC (SIPMIU Consultant) leh contractor-te an tel. He hunah hian SIPMIU engineer te, expert-te leh consultant-te'n hna an kalpui dante leh Asian Development Bank policy hrang hrangte an sawifiah a ni.

GAC-ah workshop
Govt. Aizawl College-ah nimin khan 'Personal values and life decisions and cultivating of processing artemisia A-3 plant for natural medicine' tih thupui hmangin international workshop buatsaih a ni a; Canada aṭangin Bye Bye Malaria Society hruaitu pahnih - Margo Greiner leh Stuart Spani ten an hmanpui. Workshop hi RUSA leh GAC-a Placement Cell-te buatsaih a ni a, zirlai leh zirtirtu mi 150 vel an tel a ni.