H/S Games-ah Aizawl district champion

October 31, 2017-a ṭan, 35th. Mizoram Secondary School Games 2017 chu nimin khan Lammualah khâr a ni a; a pumpuiah Aizawl district an champion.

Secondary School Games khârna inkhawma khuallian, School Education minister H Rohluna chuan, zirnaa ti ṭha turin taksa hrisel a pawimawh tih a sawi a, "Taksa hrisel nei tur chuan taksa sâwizawi leh infiamna a pawimawh. Zirlaite'n taksa hrisel an neih theih nan leh an theihnate tihpun a nih nan school games hi buatsaih a ni," a ti.

School Education Minister chuan, infiamna chi hrang hrangah Mizote’n hma an sawn zel tih sawiin, "Ṭhalaite theihna hriain sorkarin hmunhma ṭha a buatsaih zel a ni," a ti a; ṭha­lai mahni inthunun thei hlawhtlinna chang an awm zel chu lawmawm a tih thu a sawi.

35th. Mizoram Secondary School Games 2017 neih hma hian district-a inelna buatsaih hmasak a ni a, district-a ti ṭhate an tel. Kuminah hian athletics, badminton, basketball, football, table tennis, taekwondo leh volleyball-ahte inelna neih a ni a; a pumpuiah gold medal 16, silver medal pariat leh bronze medal pasarih latu Aizawl district an champion.

Best athlete (boys) chu Lal­nunpuia, Nazareth Academy, Lunglei a ni a; best athlete (girls) chu Lalvenhimi, Lallengvunga H/S, Serchhip district a ni.