BJP-in NE-a CM corrupt berah Hawla puh

BJP Schedule Tribe Morcha-a national secretary Hayithung Bill Lotha chuan, Mizoram chief minister Lal Thanhawla chu India hmarchhak state-a chief minister zinga corrupt ber niin a sawi nawn a; kum 2018-a Assembly inthlanah BJP-in bial tinah candidate neih an tum rualin, candidate tur ṭha an hmuh danah an innghah thu a sawi bawk.

Bill Lotha hian nimin khan Hotel Regency-ah thuthar thehdarhtute a kâwm a; hmarchhak state-a chief minister zingah Mizoram Chief Mi­nister chu eiru nasa ber a nih thu a sawi bakah, Mizoram minister zinga eiruknaa inhnamhnawih nasa zual pathum a sawi a, chungte chu - pakhatnaah Lal Than­zara, pahnihnaah Zodintluanga leh pa­thumnaah R Lalzirliana te a ni.

Bill Lotha chuan, tun hnai chhoah BJP-in Mizoram district panga Assembly constituency 20-ah beihpui an thlak dawn tih a sawi a; chu'ngte chu Kolasib, Mamit, Lunglei, Lawngtlai leh Siaha district-te a ni.

Zawhna chhangin Bill Lotha chuan, kum 2018 inthlanah Assembly bial zawng zawng, bial 40-ah candidate neih an tum thu a sawi a, "Bial zawng zawngah candidate dah kan tum a, mahse, candidate tur ṭha kan hmuh danah a innghat," a ti a; inthlanah MNF emaw, regional party dang emaw thawhpui an neih dawn loh thu a sawi.

Bawng talh leh a sa ei khap chungchanga zawhna chhangin Lotha chuan, "Bawng sa ei khap hi state sorkar thu a ni. State sorkara BJP telna Nagaland, Goa leh Meghalaya-ahte pawh khap a ni lo. Bawng talh khapna state-te hian an state mipuite rilru sûkthlêk thlîr chungin, an state tan leh mipui tana ṭha tura ngaiin an khap a ni," a ti.

Bill Lotha chuan zawhna dang chhangin, Mizorama BJP mite party aṭanga inhnawhchhuah vel chu state leh national hotute'n an chinfel thuai a beisei thu a sawi a, "BJP chhungah buaina leh harsatna a awm lo," a ti. BJP national president Amit Shah chu Mizoramah a zin thuai dawn thu leh, prime minister Narendra Modi pawh inthlan hmain Mizorama a zin ngei dawn thu a sawi bawk.