MNYF-in Aizawlah Vangpui Fehchhuah an nei

MNF ṭhalai (MNYF) chuan nimin khan Aizawlah 'Vângpui Fehchhuah' beihpui an thlak chhunzawm a; Mizo Hnam Run kawt, Zarkawt kâwn leh Chanmari kâwnah vantlang inkhawm buatsaihin, MNF MLA-te'n thu an sawi.

Mizo Hnam Rún kawta inkhawmah Dr K Beichhua, MLA chuan, tuna Mizoram ei leh bar dinhmun chu a lungchhiatthlak hle nia sawiin, "Kum 20 chuang chief minister kan hrawn hian kutdawh hnam leh compensation la hnamah min chhuah a ni," a ti a; Mizoram sum dinhmun chhiat chhan chu Central sorkar aṭanga sum hmuh chhiat vang ni loin, sorkarin sum enkawl a thiam loh vang niin a sawi.

Dr K Beichhua chuan, ramin zirna ṭha a mamawh tih sawiin, "He sorkar hian term hmasaa an sorkar tirh aṭangin world class education kan siam ang tiin Education Reforms Commission an din a, mahse, vawiinah hian primary school-ah zirtirtu post ruak 700 chuang a awm a, school amalgamation an kalpuite hi world class education kalpuite hmuh chhuah em ni?," a ti.

Zarkawt kâwna thu sawitu Lalruatkima, MLA chuan, MLPC Act hmanga zu zawrh vangin Mizoramah hmeithai an tam phah a, naupang fahrah an tam phah nia sawiin, "Tlaivarin kan ṭawngṭai a, chuti chung chuan kan ram hruaitute chu Pharoa ang khan an thinlung tihsakin a awm a, an harh lo a nih chuan Zoram mipuite hi nakkum inthlanah an harh ve ngei dawn a ni," a ti a; tunah chuan Excise force-te leh thlai thar hralhna tur buaipuitu tur MAMCO-te'n zu an zawrh thu a sawi.

Chanmari kâwna vantlang inkhawma thu sawitu Lalrin­awma, MLA chuan, buhfai ṭha lo vangin NGO-te an au chhuak tawh tih sawiin, "Heta ṭang hian buhfai ṭha leh ṭha lo a inpawlh tih a chiang a, sorkar hian quality control-ah chak zawkin hma la sela a duhawm hle," a ti. National Health Mission-a thawkte'n hlawh an la thei lo chu pawi an tih thu a sawi bawk.