Zira'n Ṭawi biala din a tum tawh lo?

Home minister R Lalzirliana chuan, MLA atana ṭum li thlan tlin a lo nih tawhna bial, Ṭawi constituency-ah kum 2018-a Mizoram Assembly inthlanah chuan a tan din a harsa tawh dawn niin a sawi.

Minister hian R Lalzirliana nimin khan Ruallung khuaa Ṭhálfavâng Kût a hmanpuinaah thu sawiin, Ṭawi biala din leh a tan a harsat tawh dawn chhan chu, kum 2013-a Assembly inthlan dawnah amah campaign-puitu All India Congress Committee vice president Rahul Gandhi-a'n amah (Congress candidate) chu thlan tlin a nih chuan, Saitual mipuite beisei angin Saitual district tihpuitlin a nih tur thu a sawi chung pawha district pek an nih si loh vang a nih thu a sawi.

R Lalzirliana chuan, Ṭawi bial tan hmasawnna tura kawng hrang hranga hna thawh tawh dan te, tunah PMGSY sum hmanga khaw tam tak inkalpawhna tur kawng siam tum a nih thute a sawi lang.

Home Minister chuan, Mizo­ramah hel pawl an awm tawh lohna tura HPC(D) leh sorkar inkara inbiakna neih dan te, inbiakna aṭangin hel pawlte'n Mizoram Police silai an laksak pek let leh a nih dan te, inbiakna tluang taka kalpuiin hmasawn zawnga an kal thu te, kumin Krismas hmain inbiakna hmáwr bâwk turin chhunzawm tum a nih thu te, inbiaknaah remna thuthlung siam turin ruahmanna peih thawkhat a nih tawh thute a sawi bawk.

Minister of state Van­lal­awmpuii Chawngthu pawhin thu sawiin, Mizoram sorkarin hmeichhiate hamṭhat nan ruahmanna chi hrang hrang a siam tawh tih a sawi a; hmeichhia harsatna tâwkte tan Mizoram Women Commission pan theih thute a sawi a ni.

Ruallung khua hian Ṭhálfa­vang Kût hi an khaw khelmualah an hmang a, Ruallung Welfare Committee chairman Lalṭha­tluanga'n a kaihruai a; zai­thiam­te an zai bakah, hnam lâm chi hrang hrang entir a ni a, an khua kum 80 chung lamte hnenah chawimawina an hlan. Tlaiah khawtlang mipuiin ruai an ṭheh a ni.