Ram páwna Mizote hruai haw turin Dr Thangtea'n Union Minister a ngen

Dr Harsh Vardhan ho hian May 9, Inrinni khan India hmarchhak state hrang hranga health minister leh health department hotute'n video conferencing an nei a, Covid-19 dona kawnga hmalak dan leh dinhmunte an sawiho. Mizoram aṭangin Health minister Dr R Lalthangliana bakah, Health secretary H Lalengmawia, Health Services director Dr Lalchungnunga leh National Health Mission director Dr Eric Zomawia te an tel a; sorkar laipui aṭangin minister of state for Health Ashwini Kumar Choubey leh official dangte an tel bawk.

Dr R Lalthangliana chuan, India ram páwnah Mizoram mi 500 chuang, a tam ber ṭhalai hna thawka chhuak an awm thu sawiin, "India sorkarin ram páwna tangkhang mi 15,000 vel a hruai haw tawh zingah Mizoram mi an la tel ve lo a, him taka hruai haw Mizoram sorkarin a duh a ni," a ti a, a rang lama hma la turin a ngen. Dr Harsh Vardhan chuan theihtawp chhuah a tum thuin a chháng.

Dr R Lalthangliana chuan, Covid-19 donaa Mizoram sorkar hmalaknate sawiin, Chief Minister kaihhruainain ruahmanna fel tak siam a nih thu te, Rapid Antibody Testing ṭha taka kalpui a nih thu te, Zoram Medical College (ZMC) chu Covid-19 dedicated hospital-a hman a nih thu te, ZMC-a sample testing laboratory-ah tluang takin sample test kalpui a nih thu te, district tinah Covid Care Centre (CCC) siam a nih thu te, Dedicated Covid Health Centre (DCHC) siam a nih tawh thu te, ICU awm lohnaah isolation ward dah vek a nih thute a sawi a ni.

Mizoramin Myanmar nena ramri km. 404 leh Bangladesh nena ramri km. 318 a neih thu sawiin Dr Thangtea chuan, ramrî-ah luh rûk theihna hmun 200 chuang a awm thu leh Mizoram police leh task force-te'n an vil thu a sawi a; state level, district level leh local/village level-a task force-te din a nih thu sawiin, "Health department, Home depart­ment leh department dangte thawhhona chu India ram pum tan entawntlak a ni," a ti.

Union Health Minister chuan, Covid-19 donaa Mizoram hma­laknaah a lawmthu sawiin, YMA-te chungah a lawm thu a sawi a; chawlhkar khat chhunga PCR laboratory Mizoramin a tipuitling thei chu lawmawm a tih thu leh Mizoram páwna tangkhangte an haw theih nan theihtawp an chhuah tur thu a sawi a ni.