Covid-19 dona atana NEC aṭanga hmuh cheng vbc. 3 hmanna puanzar phût

MPCC communica­tion dept. leh ZPM ṭhalai chuan thuchhuah siamin, Covid-19 dona atana DoNER (NEC) aṭanga sum hmuh cheng vbc. 3 hmanna Mizoram sorkarin an sawi thei lo nia tarlangin, a hmanna puanzar an phut.

MPCC chuan IRS pension tawh Mizo pakhatin a Twitter-ah 'NEC in covid do nan emergency in 3 cr min pe a, a hmanna kan show theilo, projected head of exp pawh kan pe theilo. Minister DONER chuan ‘emergency atan kan pek an mamawh lo tawp a nih hi' tia a post thu tarlangin, "Sorkar chetdan hi a zahthlak ngawih ngawih a, ṭan­puina sum mamawha an au an au laia ṭanpuina sum a dawn pawh a enkawl fel thei lo hi a lung­chhiat­thlak hle," an ti.

MNF sorkar chuan a hnathawk hlawh pawh an it em em nia tarlangin MPCC chuan, "An sum hmandan chungchangah sorkar khalh ngil tumin Congress chuan theihtawp kan chhuah a, CLP leader Pu Zodintluanga pawhin rawtna a thlen a, chu ringawt pawh an haw em em a ni. Chutihmek laia IRS officer pension-in hetianga sorkar kaldan puan tur a hre ta mai hi a zia lo tawpkhawk," an ti a, IRS pension tawh thu post chu a dik a nih chuan bang ngam turin Finance changtu Chief Minister an phut.

ZPM ṭhalai chuan DoNER-in India hmar chhak state-te Covid-19 dona sum an pek chhuah, Mizoramin a chan cheng vaibelchhe 3 awmna mipui hriata puangzar turin ZPM Party Ṭhalai Gen. Hqrs. chuan sorkar an phût a; DoNER aṭanga sum an hmuh hmanna an thehluh loh avangin Mizoram sorkar lakah DoNER an thinrim hle niin an sawi.

Nimina thuchhuah an siamah ZPM Ṭhalai chuan, "DoNER chuan Covid-19 natna pung zel avangin  hmanhmawh takin hmarchhak state-te pawisa a pe a, Mizoram pawh cheng vbc. 3 lai pek kan ni. He sum hi hmarchhak state pawisa dawn tur pangngai pawn lama mi a ni a, Covid-19 dona tur bika pek a ni. Pawisa hi DoNER chuan Covid-19 buaipuitu ber Health & Family Welfare Department hnuaia National Health Mission (NHM) account-ah thun luh a ni. Mahse, Finance Department chuan NHM hnen atangin cheng vbc. 3 hi an la chhuak," an ti a, a dawngtu leh hmangtu tur Health department kut aṭanga pawisa lak chhuah chu mak an tih thu an tarlang. 

Covid-19 dona tura sum lo kal ni si, Mizoram sor­karin Health department (NHM) kut aṭanga an laksak avang hian Do­NER-ah a pawisa hmanna pawh a theh­lut thei lo nia sawiin ZPM Ṭhalai chuan, "Tun hnaiah DoNER minister Dr. Jitendra Singh-a'n State tinte sum pek belh an ngaih pawha pek belh dan hriat­thiam theihna atan an sum hman dan a zawt a, mahse Mizoram Sorkar Health & Fa­mily Welfare Dept. lamin pawisa an kuta a awm tak loh avangin a hmanna an hre thei ta lo a. Cheng vbc. 3 hmanna an pek theih loh avangin Mizoram sor­kar lakah DoNER Mi­nister a thinrim hle," an ti.

Hei vang hian ZPM Ṭha­lai chuan Do­NER aṭanga Covid-19 dona atana cheng vbc. 3 hmanna hi mipui hriat­a puangzar tur­in Mizoram sorkar an phut tih an tarlang.

Thuchhuah chuan pawisa lo luh dan hi Mizoram sorkar pawhin April 4, 2020 khan sorkar press release hmangin an tarlang tawh tih sawiin, "He sum hian COVID-19 dona a tihchak beisei a ni. He sum hi Ministry in Hmarchhak State-te tana scheme leh project kalpui mek tibuai lova sum a ruahman belh a ni," tiin sorkar hian a lo puangzar tawh a ni.