Covid-19 hnehtu Rev. VL Hruaia Damdawi-in aṭangin a chhuak ta

Mizorama Covid-19 vei awmchhun Rev. VL Hruaia Khiangte (50), Mission Vengthlang chu ni 46 chhung State Referral Hospital-a a riah hnuah May 9, Inrinni chawhnu khan dam takin a chhuak ta. Hripui lakah fihlîm tawh mah se, an inah ni 14 chhung tal la inkhung hrang tura tih a ni.

Tarlan tawh ṭhin angin, Rev. VL Hruaia Khiangte hi Netherlands khawpui Amsterdam aṭanga rawn hawin, March 15, 2020-ah Delhi a thleng a, March 16-ah Delhi aṭangin Indigo Airlines hmangin Guwahati a thleng a, chumi ni vék chuan Guwahati aṭangin GoAir thlawhna hmangin Mizoram a thleng a ni.

Aizawla a rawn haw hnuah March 18-ah khawsik a nei ṭan a, March 22-ah an inah a swab sample lak niin, Gauhati Medical College laboratory-ah thawn a ni a; March 24-ah Covid-19 a kai tih finfiah a ni. March 24 zan hian Covid-19 designated hospital - State Referral Hospital-ah lâk nghal a ni a; zan 46 damdawi-ina a riah chhungin hun tam ber chu ICU-a enkawl a nih bakah, hun rei tak chhung oxygen leh ventilator hman a ni bawk.

Rev. VL Hruaia hi ZMC Covid-19 Laboratory-ah chuan April thla tàwp lam khan Covid-19 lakah a fihlim (negative) tawh tih hmuh a ni a; a finfiah nan ni li chhung a záwna swab sample an lâk chu May 1 khan Silchar Medical College laboratory-ah endik turin thawn a ni. SMC laboratory-a endiknaah ni li chhunga sample lakte chu a negative vek tih hmuh a ni a, May 4, 2020 zan khan Covid-19 a vei tawh lo tih Mizoram sorkar (IPR depart­ment) chuan a puang ta a ni.

VL Hruaia Khiangte hian May 9, Inrinni chawhnu dar 2:15 khan State Referral Hospital a chhuahsan a, hospital medical superintendent Dr HC Laldina bakah amah enkawltute leh thawktu dangte'n an thlah. An in pana a haw kawngah veng ṭhenkhatah chuan mipuiin kawng sir aṭangin Covid-19 laka a dam ta lawmpui nan kut béngin an lo lâwm a ni.

Rev. VL Hruaia Khiangte hian Amsterdam-ah Pathian thu (Ph.D.) a zir a, BCM hnuaia Pathian thu zirna, Academy of Integrated Christian Studies-ah zirtirtu hna a thawk a ni.