Sorkar hnathawk leh mipui health care a inanga kalpui tumin hma kan la - CM

Chief minister Zoramthanga chuan, sorkar hnathawk leh mipui (sorkar hnathawk lo)-te'n health care scheme inang tlâng an neih theihna turin hma an lak thu a sawi.

Indian Medical Association, Mizoram State Branch inkhawmpui October 28, 2022-a a hmapuinaah Chief Minister chuan, "Health care scheme sorkar hnathawk nen danglam chuang lo a, inang vek, a facility pawh inang thawkhata kalpui theih tumin hma kan la," a ti.

Zoramthanga chuan, health care scheme-ah bá a tam lutuk an tih pawhin an ngawi ràn tih sawiin, "Bá a tam kan hai lo. ADB loan cheng vbc. 1,000 kan pûk huna a pung nen, state economy a ṭhat huna state sum nen hmasawnna ropui neih theih kan inring," a ti a; Mizoramin a pár zú tlan tlàn tur a la chhuak ang tiin theihtawp an chhuah thu a sawi.

Health care scheme chungchangah politics-ah sawiselna a awm thu sawiin CM Zorama chuan, "Sawiselna pawh a dik. Tlin lo chung chungin a ṭha si a, kan kalpui. Kan tlin kan ti miah lo, bá pawh a tam. 'Zah fâka lú chhum suh' ti ang maiin kan ti ṭâng ṭâng a ni," a ti.

Chief Minister sawi danin, health care scheme hi MNF sorkar hmasak laia bul ṭan niin, ADB loan cheng vbc. 100 hmanga bul ṭan a ni a, mahse, ADB loan chu an sorkar tàwp lamah sum a chhuah chauh avangin an khawih hman lo a ni.

Kum 2018-a sorkarna an chan leh hnuah kum 2019 khan health care scheme atan cheng vbc. 50 an dah belh a, vbc. 100 an lo dah tawh leh a pung nen cheng vbc. 210 vel a awm mek. Mahse, a pung ringawt leh mipui thawh khawmin bill pek chhuah tur a daih lo.

ADB an dawr leh a, cheng vbc. 1,000 pûk Ministry of Finance-in an phalsak tawh tih sawiin Zoramthanga chuan, "A lo thleng lek lek tawh. Cheng vbc. 1,000 aṭang hian vbc. 720 vel chu central sorkar rulh tur a ni a, Mizoram sorkar rulh tur chu 20% a ni," a ti.