Tuialhthei phur kângah mi 4 kâng hlum

October 29, Inrinni tlai dar 2:30 vel khan Tuirial khuaah tuialhthei phur (tank lorry) a chesual a, zan dar 6 rîk hma deuhin a kâng a, mi pali an kâng hlum. Tank lorry bakah taxi pakhat leh scooter (scooty) pathum a kâng chhe vek bawk.

Police leh Tuirial YMA hruaitute hnen aṭanga Vanglaini thu dawn danin, tank lorry hi a tlân chak hle a, a tlân chak vanga letah ngaih a ni. Tank lorry aṭangin petrol a pût chhuak a, chu chu mi eng emaw zatin an dawh a ni.

Lirthei bula mi eng emaw zat an awm laiin zan dar 6 rîk hma deuhah tanker chu a kâng a, a bul maia awm zinga mi pali chu a hmunah an kâng hlum nghal. An kan nasat avangin tute nge an nih hriat lawk theih a ni lo a, a hnuah anmahni fi nfi ah theih a ni.

Tanker kâng avang hian mi 15 an hliam a, damdawi-inah lak nghal an ni a; Synod Hospital-ah mi pakua, Civil Hospital, Aizawl-ah mi pali leh Thingsulthliah damdawiinah mi pahnih hruai an ni. Synod Hospital-a hruai zinga pakhat chu nimin tlai lam khan ICU-ah enkawl a ni.

Mitthite chu Tuirial community hall-ah lumen an ni a, nimin chawhma dar 10 vela Civil Hospital, Aizawlah endik (postmortem) an nih hnuah an khua/veng panpui an ni. 

Mitthite chu Tuirial khaw mi pahnih,  ingsulthliah mi pakhat leh Làmherh mi pakhat an ni a; Lamherh khaw mi chu Ramthar Veng, Aizawla cheng niin, a ruang hi a chenna ina lak a nih hnuah an khua panpui a ni.

Tank lorr y chetsual hlimah a khalhtu hmuh a la ni a, mahse, a kan hnuah chuan hmuh zui a ni lo. Tuirial bialtu MLA chief minister Zoramthanga chuan chhiatna thlenna hmun hi Inrinni zan khan a tlawh a; "Tuiriala chhiat tawhna rapthlak tak thleng hian ka rilru a tiná a, hrehawm ka ti hle mai. He chhiat tawhna vanga boral tate thlamuang takin châwl se. Lusun khawharte

Pathianin awmpui tlat se la, hliam tuarte pawh an dam leh thuai ka duhsak e," tiin a tarlang.