Mizoramah dengue vangin mi 2 thi tawh; Kum 11 chhungin sikserh vei 1,22,312

Kum 11 chhung, kum 2011-12 leh 2021-22 inkar khan Mizoramah sikserh (malaria) vei mi 1,22,312 hmuh niin, sikserh vangin mi 167 an thi. Hetih lai hian, kuminah Dengue vanga thi an awm ṭan a, mi pahnih an thi tawh.

Health Services joint director Dr Hmingthanmawii hnen aṭanga thu dawn danin, kumin chhungin October 23 thleng khan mi 2,000 chuang endik aṭangin dengue vei mi 372 hmuh chhuah a ni tawh a; dengue vangin mi pahnih an thi tawh a, Bethlehem Vengthlang leh Vaivakawna mite an ni.

Hetih lai hian, Mizoram Statistical Abstract 2021, tun hnaia Economics & Statistics department-in an tihchhuaha a lan danin, kum 10 chhung, 2011-12 leh 2020-21 inkarah mi 5,549 endik aṭangin dengue vei mi 1,067 hmuh chhuah a ni a, 19.23% a ni. Kumin bika hmuh chhuahte nen kum 2011-12 aṭanga kumin October 23 thlenga hmuh tawh zat chu 1,181 a tling.

Kum 2020-21 chhung bika district hrang hranga dengue vei hmuh dan chu - Aizawlah 18, Lungleiah 36, Saihaah pakhat, Champhaiah pali, Kolasib leh Serchhipah pahnih ve ve, Mamitah pathum leh state dang mi pakhat a ni a; Lawngtlai district-ah hmuh a ni lo.

Mizoram Statistical Abstract 2021 tarlan danin, financial year 2011-12 leh 2020-21 inkar chhung khan Mizoramah sikserh vei mi 1,16,675 hmuh chhuah niin, chu'ng zinga mi 157 chu an thi a, sikserh vanga thi zat percentage chu 0.13 a ni.

Thisen endik zat erawh kum ṭhenkhatah tarlan loh a awm avangin hriat theih a ni lo. Hetih lai hian, State Vector Borne Diseases Control Programme tarlan danin, kum 2021-22 chhung khan mi 2,80,693-te thisen endik aṭangin sikserh vei mi 5,637 hmuh a ni a, mi 10 an thi.

Statistical Abstract-a tarlan nen kum 2011-12 leh 2021-22, kum 11 chhunga sikserh vei hmuh zat chu mi 1,22,312 an ni a, mi 167-in an thihpui a ni.

Kum 11 chhunga sikserh vei hmuh chhuah tam ber kum chu 2015-16 niin, mi 28,593 hmuh chhuah a ni a, thisen endik zat 3,02,942 aṭangin 9.44 a tling. Sikserh vanga thi an tam ber kum, 2014-15 chhungin mi 31 an thi a, kum 2016-17 aṭangin sorkar kum khat chhunga thi zat 10 aiin a tam lo vek thung.

Kum 2020-21 bikah sikserh vei hmuh chhuah tamna ber chu Lawngtlai district niin, mi 4,190 hmuh a ni a, hmuh chhuah zawng zawng 8,349 aṭangin 50.19% a tling a; a dawttu Lunglei districtah mi 2,926 hmuh a ni. Kum 2021-22 chhunga sikserh vei hmuh chhuah mi 5,637 zinga 4,564 chu malaria Pv an ni a, mi 1,073 chu Pf an ni thung. Sikserh vei hmuh tamna ber Lawngtlai district-ah mi 2,241 hmuh niin, a dawttu Lunglei district-ah mi 1,817 hmuh a ni a; Mamit district-ah mi 974, Siaha district-ah 430, Aizawl district-ah 72, Serchhip district-ah 43, Kolasib district-ah 34 leh Champhai districtah mi 26 hmuh a ni bawk.