Aizawl-Imphal Alliance Air hawng

Aizawl leh Imphal inkara thlawhtheihna Alliance Air thlawk thar chu nimin khan video conference kaltlangin hawn a ni a; Lok Sabha MP C Lalrosanga, minister of state Robert Romawia Royte leh Civil Aviation principal consultant J Lalhmingliana ten chief secretary video conference room aṭangin an hmanpui.

Hawnna inkhawmah hian India hmarchhak state - Assam, Manipur, Arunachal Pradesh leh Meghalaya-a thlawhna thlawk thar turte hawn nghal a ni a; Civil Aviation minister Jyotiraditya Scindia chuan, "Act East Policy kalpui mekah hmarchhak state leh central-te inkalpawh tawnna changtlung zawka siam zel tum a ni a, ram dangte nena inkalpawhna tur international service atan pawh hmalak zel a ni," a ti.

Robert Romawia chuan, Mizoram chu India hmarchhak kila awm a nih avangin lei lam leh van lama inkalpawhna ṭha neih a pawimawh zual bik thu sawiin, "Imphal leh Aizawl inkara Alliance Air service thar hawn a ni hi Manipur leh Mizoram mipui inkara inpawh tawnna atan te, economy bakah, tourism tihhmasawnna atan a pawimawh hle dawn a ni," a ti a, Civil Aviation Ministry leh Alliance Air hotute chungah lawmthu a sawi.

Aizawl leh Imphal inkara Alliance Air thlawhtheihna thlawk tur chu chawlhkar khatah ni nga thlâwk tura ruahman a ni.