Nakkum inthlanah Pathianin puan vár min sintir leh ang - Zoramthanga

MNF president Zoramthanga chuan, kum 2023-a inthlanpuiah Congress party-in MLA pahnih/ thum bâk an neih a rin loh thu a sawi a, "Thisen tam tak tak chhuaka hreawm tam tak tuartute hi nakkum inthlanah Pathianin puan vár min sintir leh ang," a ti.

Zoramthanga hian October 29, Inrinni khan Durtlang Leitan YMA Hall-a Aizawl North-I MNF Block Conference a hmanpuinaah thu sawiin, Congress party chungchang a sawi a, "Delhi lamah kum 2014 inthlanah naménloin an tla a, kum 2018-ah Zoram mipuiin nasa takin an paih thla a ni," a ti a; varhparh arsi a eng zual zel dawn a, Pathianin an kutah sorkarna a dah leh ngei dawn niin a sawi.

ZPM party chungchang sawiin Zorama chuan, "Hming an ngah tawh a, an hming a tam tawh lutuk a, sawi sual palh pawh a hlauhawm. An leader Pu Duhoma pawh kum 34 zet a bei tawh a, anmahni party din ngei pawh an kalsan leh zel a, tun thlengin an la hlawhtling thei lo. Kum 2018 inthlan khan 'Kohhran unit-ah kan hmang' an ti a, tunah chuan a hmaa an sawi ang khan an awm tawh lo. Tui anga nghet lo kutah kan
Pathian hian rorelna a dah ngai lo ang," a ti.

Zoramthanga chuan MNF chungchang sawiin, "MNF-ah chuan senior leh junior kan awm lo, Mizo kan nih a, hnam rilru nen kan lo pian chhuah hian MNF rilru pu sa vek kan ni. Kum lama upa apiang MNF-ah chuan mi senior kan ni mai," a ti a; BJP-in MNF bei vak vak mahse beih lêt enah an en loh thu leh PC party chu sawi tham an awm loh thu a sawi.

Aizawl North-I MNF Block Conferenceah hian MNF adviser R Lalzirliana leh Aizawl mayor Lalrinenga Sailo-te pawhin thu an sawi a; Aizawl North-I biala unit hrang hrang aṭangin voter 315-te MNFah lawm luh an nih thu MNF thuchhuah chuan a tarlang.