Kum 2023 hi retheihna sal aṭanga Mizoram Chhanchhuah hun a ni dawn - BJP Hmuaka

BJP, Mizoram Pradesh president Vanlalhmuaka chuan, kum 2023-a Mizoram inthlanpui chu retheihna sal aṭanga Mizoram chhanchhuah hun tur a nih dawn thu leh chhanchhuaktu tur chu BJP an nih thu a sawi.

Mizoram BJP pisaa October 28-a inkhawmah thu sawiin Vanlalhmuaka chuan, Mizoram chu retheihna salah a tàng mek thu a sawi a, "Kum 2023 MLA general election awm tur hi retheihna sala kan tànna aṭanga Mizoram kan chhuah hun tur a ni dawn. Chumi atana tawtawrawt hâmtu chu BJP kan ni," a ti.

Vanlalhmuaka chuan, Mamit district-a khaw hrang hrang an tlawhnaah, hmasawnna thlen mumal lohna khua a tam tih a sawi a; Aizawl aṭanga Silchar leh Marpara hlat lam a inang chiah tih sawiin, "Darkar rukah Silchar kan thlen theih laiin, Marpara chu darkar 12 vel tlân a ngai thung," a ti a, chu chuan Mizoram khaw tam tak kawng awm dan tur a hril thu a sawi.

BJP President chuan, Mizoram sorkarin central programme tihhlawhtlinna tur sum a dawnte a chingfel thei lo tih sawiin, "Housing for All aṭangin central-in pawisa a rawn pe tawh a, mahse, MNF sorkar hian a pe kim thei lo.

MNF sorkarna hnuaia kan awm lai hi hun ṭha lo a ni," a ti.