ZPM a sorkar chuan kum 3 chhung Sawhthing kan lei phawt ang - Duhoma

ZPM Leader Lalduhoma chuan October 29, Inrinni khan Hrangturzo bial chhunga Lungkawlh, North Vanlaiphai leh Lungchhuan khuaahte vantlang inkhawmah thu sawiin, ZPM party chu kut hnathawktute ṭhian an nih thu leh ZPM a sorkar chuan kum thum chhung sawhthing an lei phawt dawn thu a sawi.

Lalduhoma chuan, "ZPM hi kut hnathawktute ṭhian kan ni a, kan ramah bána kaih ngai chhungkua kan la tam em em a, an bána kài tur chuan kan thlai tharte sorkarin a lei a ngai. Sorkar kan hrawn tawhte'n thil hrang hrang min chìntir a, mipuite'n kan chíng zel. Sorkarin a market min ngaihtuahpui leh si loh avangin kan hlawhtlinpui thei lo a, a thar tam apiangin tihṭawih tur kan ngah ta a, a hlawhtling apiang hlawhchhamah kan insiam ta a ni," a ti.

ZPM kalphung tharah chuan sorkarin thlai thar a lei dawn tih sawiin Duhoma chuan, "A taima apiang, a thar chhuak hnem apiangin budget an hûi hnem mai dawn a, party kan sawi dawn lo. Sawhthing pawh kum thum chhung kan lei dawn a, kum thum hnuah chuan tih zel chi a ni em tih kan ngaihtuah ang," a ti a, chhunzawm zel chi a nih chuan permanent system-in an inchìntir tawh dawn thu a sawi.

Lalduhoma chuan, America ramah term hnih bak president an ni ngai lo tih sawiin, "Term hnih president an nih chuan a dangin an thlâk mai ṭhin. Tunah hian kan ram media zawng zawng en ila, mipuiin nakkum an thlir a, MNF ni lo, Congress ni lo ram hruaitu kan mamawh tih hi a ni," a ti.

ZPM Leader chuan, ZPM-in a din tirh aṭangin ertu a ngah tih sawiin, "President-ah an buai ang, symbol-ah an buai ang, chief minister-ah an buai ang, tiin nasa takin min bei a, kan buai lohzia chu, tunah hian kan party tluka inlungrual an awm lo," a ti a; Congress party hun a liam mek thu leh MNF chu an hruaitupain ni tin a hniam zawngin a kaihhruai mek thu a sawi bawk.