Zarkawtin hnam dang endik thut

Zarkawt Local Task Force-te chuan nimin khan an veng  huam chhunga hnam dang awmte sawi lawk awm loin an endik thut (surprise check) a, lockdown ṭan tirha awm lo hnam dang eng emaw zat an hmu chhuak.

Zarkawt khawtlang hruaitute hnen aṭanga Vanglaini thudawn danin, a tirah chuan lockdown chhunga state pawn aṭanga hnam dang lo lut ru angah an ngai a, an buai hman hle a; nimahsela an inzawh chian hnuah lockdown tirha Zarkawt-in temporary ID an siam hmaih te, a ṭhen chu veng dang aṭanga lo leng an awmna veng temporary ID neite an ni hlawm.

Zarkawt khawtlang hruai­tute chuan Mizoram khua leh veng tina khawtlang hruaitute chu an area chhunga hnam dangte zawng chhuaka temporary ID siamsak vek tura an duh thu Vanglaini an hrilh a, "Hei hian lockdown hnua hnam dang lo lut ru an awm leh awm loh a veng thei dawn a ni," an ti.

Aizawla veng eng emaw zatin lockdown hunlaia an veng chhunga hnam dang awmte hi chhinchhiahin temporary ID an siamsak a, hetiang ID nei lo chu an vengah awm an phal lo a, hei hian hnam dang lo lut ru zawn chhuah kawngah nasa takin a pui thei dawn a ni.