Covid-19 vanga thi mi 2 an awm belh

Mizoramah Covid-19 vei October 28, Zirtawpni khan mi 15 leh October 29, Inrinni khan mi panga hmuh chhuah a ni a, October 29, Inrinni khan hripui vanga thi mi pahnih an awm belh. Hripui vei dam tawh Inrinni khan mi 16 leh nimin khan mi panga chhuahtir an ni.

IDSP aṭanga thu dawn danin, October 28-a Covid-19 vei hmuh chhuahte chu Lunglei district-ah mi pariat, Aizawl district-ah pali, Serchhip district-ah pahnih leh Hnahthial district-ah mi pakhat an ni a; swab sample 87 endik niin, positivity rate 17.24% a tling.

October 29, Inrinnia Covid-19 positive hmuh belh pangate chu Aizawl leh Saitual district-a mi pahnih ve ve leh Champhai district-a mi pakhat an ni a; sample 46 endik niin, positivity rate 10.87% a ni.

Covid-19 vei enkawl lai Lalṭhakima (44), Electric Veng, Aizawl chu October 29, Inrinni zing dar 4:10 khan State Referral Hospital-ah a thi a, Covid-19 positive a ni tih October 28 khan hmuh chhuah niin, natna dang nei tel a ni.

Inrinni vêk zan dar 7:30 khan C Lalnuntluanga (38), Salem Veng, Aizawl pawh hripui vangin SRHah a thi a, natna dang nei a ni a, Covid-19 positive a ni tih Inrinni vêk khan hmuh chhuah a ni.

Mizoramah swab sample 19,87,919 endik tawh niin, Covid-19 vei 2,38,804 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,038 (99.68%) chhuahtir an ni tawh a, mi 726 (0.30%) thi tawhin, enkawl mek mi 40 (0.02%) an awm.