Khawpui 4-ah Two Wheeler Rally buatsaih
Central KṬP bultumin zu, ruihhlo leh mipat hmeichhiat hman khaw lohna leh chutiang avanga HIV/AIDS hluar zel laka invenna tura mipui hnena inzirtirna (awareness) atan, November 4, Inrinni khan Lunglei, Lawngtlai, Serchhip leh Siaha-ahte Two Wheeler Rally neih a ni.
Lunglei, Lawngtlai, Serchhip leh Siaha khawpuia HIV/AIDS Awareness Two Wheeler Rally-ah hian ṭhalai ṭhahnem tak telin, khawpui chhungah two wheeler hmangin kawng an zawh a; inkhawm tâwi buatsaih niin, ruihhlo leh mipat hmeichhiatna laka fihlim tura inzirtirna thuchah an puangzar a ni.
Inrinnia rally-ah hian Lungleiah chuan Lunglawn aṭanga Pukpui Centenary lungphun thleng kawng zawh niin, mi 250 vel an tel a; Serchhipah chuan hmun pahnih - Chhiahtlang Kâwnveng leh Sailiamkawn aṭanga kawng zawh niin, mi 120 vel an tel. Lawngtlaiah chuan 71RCC camp aṭanga Areopagy thleng kawng zawh niin, mi 90 vel an tel a, Lawngtlai Chandmary unit ṬKP member-te'n an ṭawiawm a; Siahaah chuan mi 70 velin kawng an zawh thung.
HIV/AIDS Awareness Two Wheeler Rally hi district khawpui tinah neih tum a ni a; November 11-ah Champhai, Mamit leh Kolasib-ahte neih a ni ang a, November 25-ah Aizawlah neih a ni ang.
CKṬP general secretary Upa Zonunmawia chuan, KṬP Rorel Inkhawma an thurel angin, Mizo ṭhalai eng emaw zat thlâna nawr liam mektu zu, ruihhlo leh mipat hmeichhiat hman khaw lohna vanga hri ṭha lo kai mekte chhanchhuah an nih theih nan leh chu'ng thil ṭha lote laka ṭhalaite an inven theih nan Two Wheeler Rally buatsaih a nih thu a sawi.