ASI Aizawl Circle-ah Supdt. Archaeologist

Archaeological Survey of India (ASI) Aizawl Circle pisaa superintending archaeologist thawk tura dah, Dr Sujeet Nayan chuan November 2, 2017 aṭangin mawhphurhna a la ṭan. ASI Aizawl Circle hian Mizoram bakah, Manipur leh Tripura state-te a huam.

INTACH, Mizoram Chapter tarlan danin, ASI Aizawl Circle-a superintending archeaologist Dr Sujeet Nayan hi Vangchhia, Champhai district-a, Mizo pipûte hmun hluite archaeological excavation hmanga lo zir chiang tawhtu a ni.

INTACH, Mizoram Chapter chuan, Aizawlah ASI Circle a awm theih nan hun rei tak tawh aṭangin hma an lo la tawh tih sawiin, ASI hotute'n ASI Aizawl Circle an din leh a enkawltu tura Dr Sujeet Nayan an dah chu lawmawm an tih thu an tarlang.

INTACH, Mizoram tarlan danin, Dr Sujeet Nayan hian kum 2016 tìr lam khan Vangchhia khaw daiah hmànlaia inphûmna, thlân hmun ropui tak a hmu chhuak a ni. Thlân hmun hlui laih chhuah a nih theih chhan chu, kum 2015-ah ASI director general Dr Rakesh Tiwari INTACH Mizoram convener P Rohmingthanga leh co-convener Rin Sanga ten Champhai tlangdunga Mizo pipute lungphun hlui leh hmun hlunte an fanpuina rah chhuah a nih thu sawiin INTACH chuan, "Vangchhia khaw dai laih nan hian excavation license pek chhuah a ni," an ti.

Vangchhia khaw daia hmanlai hmun hlui zawn chhuah belh hna chu January 2018 tìr aṭang chhunzawm tum niin, phalna zau zawk excavation license pawh pek chhuah a ni tawh a; kumin December laihâwl vel aṭangin Champhai leh a chhehvelah exploration neih tum a ni bawk.

INTACH Mizoram Chapter chuan, Farkawn, Dungtlang, Lianpui leh Lung­phunlian khaw bula pipute hmun hluite pawh National Importance-a puan a nih theih nan ASI an lo nawr tawh tih an sawi a, "September thlaa Union minister for Culture Dr Mahesh Kumar hnena kan lo thlen pawhin hma chak zawka a sawn beisei a ni," an ti.