MNYF-in Vangpui Fehchhuah chhunzawm

MNF ṭhalai MNYF headquarters chuan Inrinni khan Kolasib leh Kawnpuiah 'Vangpui Fehchhuah' beihpui thlak an chhunzawm a; MNYF general headquarters aṭangin president Lalrin­awma, MLA leh mi dang 60 velin an hmanpui.

Kolasib Diakkawna vantlang inkhawmah MNYF President chuan, Mizoram sorkarin world class education din tuma hma a laknaah sorkar sikulah trained teacher an tam tial tial laiin zirlai an tlem telh telh tih a sawi a, "Hei hian system fel lo a awm tih a tichiang hle a ni," a ti.

Lalrinawma chuan, zirtirtu Transfer & Posting Rules mumal a awm loh avangin zirna-in hrang hranga zirtirtu sem rual kawngah Mizoramin harsatna a tâwk mek tih sawiin, "Hei hi MNF kan sorkar chuan theihtawpin hma kan la dawn a ni," a ti a; MNF leh mipui nawrna vanga CBI koh luh a ni dawn ta chu lawmawm a tih thu sawiin, thil dik lo awmte chhui chhuah a nih ngei an beisei thu a sawi bawk.

Kawnpuia vantlang inkhawmah chuan MNYF vice president H Ram­dinliana'n thu a sawi a ni.