Assam Rifles Expedition team Aizawlah

Assam Rifles chuan an din champha vawi 183-na pualin October 30, 2017 aṭang khan Sardar Vallabhai Patel Unity & Heritage Motorcycle Expedition an buatsaih. Expedition team hi Shillong aṭangin ṭan a ni a, Mizoram rawn panin, Zirtawpni tlai khan Aizawl an rawn lut a, Lammualah Governor Lt.Gen. Nirbhay Sharma hoa lo hmuah a ni.

Governor chuan, expedition-a telte chu an vanneih thu sawiin, "Expedition hi kan ṭhenawm ramte nena inlaichinna ṭha siamtu a nih bakah, India hmarchhak biala chengte impumkhattirtu ni se. Ram pathuma ramri vengtute inkarah pawh thawhhona ṭha a awm phah ngei ka beisei," a ti a; Assam Rifles-te chu an kal zelna turah duhsakna a hlan.

Assam Rifles 23 Sector DIG Brig. MS Mokha chuan, expedition ngaihtuah chhuah a nih dan leh huaihawt tura hmalak ngaite an bawhzui dan a sawifiah a ni.

Expedition-a telte pual hian Inrinni zing khan Lammualah Home minister R Lalzirliana hoa hun hman a ni a; Home Minister chuan, Assam Rifles-te'n expedition an buatsaih leh an ram tlawhte zinga Mizoram a tel ve chu lawmawm a tih thu sawi.

Inkhawma telte hi Home Minister hoin Lammual aṭanga tlan ṭanin, Sikulpuikawn thleng an tlan a, Lammualah an let leh a ni. Tlanna tel naupang kum 18 hnuai lam mi pakua, puitling kum 18 leh 40 inkar mi paruk leh puitling kum 40 chung lam mi paruk hnenah medal hlan a ni.

AR Expedition team-ah mi 33 an tel a, bike-in India hmarchhak state - Meghalaya, Assam, Manipur, Nagaland, Mizoram leh Tripura-te bakah, Bangladesh leh Myanmar an tlawh dawn a; ni 19 chhungin km, 2,150-a thui an tlan dawn a ni.