KHAWTHLIR

Thisen pe
Dinthar Branch KṬP chuan an din champha vawi 41-na lawm nan Inrinni khan Synod Hospital tan thisen unit 34 an pe a, a petute mipa 30 leh hmeichhia pali an ni. Mara Students' Union general headquarters pawhin MSO Day pualin Inrinni khan Siaha District Hospital tan thisen unit 29 an pe a, a petute mipa 23 leh hmeichhia paruk an ni.

SDA hmeichhe Inkhawmpui
Seventh Day Adventist kohhrana Women's Ministries chuan November 3, Zirtawpni zan aṭang khan Aizawla Seventh Day Tlang Kohhranah inkhawmpui lian an hmang a, nizan khan a ṭiak. Inkhawmpuia thupui chu 'I rawngbawlna kha hlen rawh' tih hman a ni a; palai 1,000 vel an riak lut a ni.

MSO Day lawm
Mara Students Organisation (MSO) chuan Inrinni khan an din champha, MSO Day an hmang a; Siaha leh Mizoram páwn khawpui dangahte blood donation camp an huaihawt. MSO hi kum 1965-ah Shillong-ah din a ni.

NLUP sem
Commerce & Industries department chuan Inrinni khan Kolasib-ah NLUP ṭanpuina an sem a, bialtu MLA PC Zoram Sangliana'n a hmanpui. Ṭanpuina hi automobile work, backsmithy, electronic repair, handloom, leather & hood work, petty trade-1 leh tailoring thlangtu mi 62 hnenah Rs. 1,801,620 sem a ni.

Free Clinic
Mercy Veterinary Hospital, Ramhlun Venglai chuan an din champha lawmna atan Inrinni khan a thlawna ran entirna (free clinic) an buatsaih a, ui a hri danna an pe nghal. Ran entirna rual hian ran damdawi a thlawnin an sem a, ui leh zawhte 300 vel hriselna dinhmun endik a ni.

SAY Council
Salvation Army Central North Division-a thalai pawl chuan Ramhlun Veng Corp-ah Inrinni khan SAY General Council an nei. SAY Council-ah hian kum 2018-a rawngbawl dan tur ngaihtuah a ni a, chawhnu lamah kum 2018 budget siam dan tur sawiho a ni.