BSF-in phal lo mah se, YMA duty zel dawn

YMA Sub-Headquarters, Lunglei chuan thuchhuah siamin, Lunglei district chhunga Mizoram ramri hmun ṭhenkhatah Border Security Force (BSF)-te'n duty phal lo mah se, ram leh hnam him nan an duty zel tur thu an puang.

May 9, 2020-a Lunglei Sub-Hqrs. YMA thuchhuah tarlan danin, Covid-19 laka Mizoram a him theih nan Mizoram leh Bangladesh ramrî-ah task force leh Young Chakma Association (YCA)-te an duty ṭhin a, BSF 60 battalion leh 131 battalion-te an duty bawk. YCA ngenna bawhzuiin YMA, Khawthlangtuipui Group chuan Covid-19 laka Mizoram a him theih nan tih rilrua pu chungin YMA-te ramri vénga duty ve ni se tiin May 5 aṭangin an duty ṭan a ni. 

YMA duty-te chu BSF-te'n thawhpui thei loin, Chawilung South Branch YMA duty-te leh YCA duty-te chu May 8, 2020 zanah an duty-na hmun aṭangin an hawtir a ni. Ramria duty-te tlawh tura Khawthlangtuipui Group YMA hruaitute May 9, Inrinnia an kal chu Nunsury-ah BSF 131 battalion-te'n lo dangin kaltlang an phal lo leh bawk.

Lunglei YMA chuan, ramri venghim tur BSF-te'n ram leh hnam himna atana YMA duty-te thawhpui thei loa an tana harsatna an siam fo a, Bangladesh nena inkalpawhna remchang, inluhpawhna atana hman rûk reng - fencing gate no. 14, 15 leh 16 inkarah YMA leh YCA duty dah phal loin an hawtir chung­changah, "BSF-te thil tih dan hi a fel lo kan ti a, hriatthiam har kan ti tak zet a ni," an ti.

•    Kan ram kan hnam him nana rami venga duty hi chhunzawm zel ni se, hemi lo dodaltute chu eng mi pawh ni se, hripui laka kan ram leh hnam himna tur a nih chuan a ṭul ang leh kan thiam angin kan hmachhawn zel ang.

•    Ram leh hnam himna tura Bangladesh ramri hrûla duty-te'n harsatna an tawh ṭhin leh an tawh mek hi a rang thei ang berin Mizoram sorkarin chingfel rawh se.

•    Ramri hungna hnuai culvert kua, ram dang mite'n Mizoram luhna atana an hman ṭhin, Lunglei leh Lawngtlai district huam chhunga mi, tun thlenga pin a la ni lo hi a rang thei ang bera hma la turin Mizoram sokar kan ngen nawn a ni.

•    Kan ngennate hian ngaih pawimawha hlawh lo a nih chuan, ramri vénga kan member duty-te kohkir ni se, Bangladesh ramri aṭanga hripui laka kan him lo a nih chuan a mawhphurtu nia kan hriatte chu na takin kan dem ang.