Hachhek bialah sorkar hnathawk Pisa kai turte dan a ni dawn ; Darlakah kuhva rah phur motor a kang

Hachhek Bial Kuhva Chingtu Pawl (HBKCP), Hachhek bial chhunga village council-te leh pawl hrang hrangte an kuhva tharte hralh a nih theih nana hma la tura sorkar karna atan vawiin, November 1 aṭanga November 4, 2022 thleng an bial chhunga sorkar hnathawk pisa kai turte dan an tum. Hetihlai hian, October 30, 2022 chawhnu lam khan Hachhek bial chhung Darlak khaw bul lawkah dan loa Myanmar aṭanga lakluh nia hriat kuhva rah lakluh phurtu lirthei a kang.

HBKCP leh pawl hrang hrang hruaitute bakah, VC-te nimina Kawrthah North YMA Rúna ṭhukhawm chuan, sorkar karna atan November 1-4, 2022 chhung an bial huam chhunga sorkar hnathawk pisa kai turte dan an rél a ni.

HBKCP leh Hachhek biala pawl hrang hrangte October 27, 2022-a ṭhukhawm chuan, Hachhek biala kuhva tharte hralh chungchanga an harsatna tun thlenga sutkian a la nih loh avangin October 31, 2022 thleng sorkar hmalakna ngaihchan an zel a; sorkar hmalakna a awm loh chuan lungawi lohna lantir nan November 1, 2022 aṭangin tiam chin awm loa total bandh kalpui an lo rél tawh bawk.

October 31, 2022 zanlai thlengin sorkar aṭanga thu lawmawm an hmuh loh avangin November 1-4, 2022 chhung sorkar hnathawk pisa kai tur dan an rél ta a ni. Ruahmanna an siam dan chuan, November 1-4, 2022 chhunga an hmalaknain awmzia a neih loh chuan November 5-8, 2022 chhung Hachhek bial chhunga kawngpui zawng zawng an dang dawn a; chu chuan awmzia a la nei lo zel a nih chuan November 9, 2022 aṭangin total bandh kalpui an tum bawk.

Nimina HBKCP leh pawl hrang hrangte ṭhukhawm chuan, an kuhva tharte hralh mumal theih a nih loh avanga an harsatnate vawi tam tak sorkar hotute hnena an thlen hnu pawha tun thlenga sutkian a la ni lo chu hriatthiam harsa an tih thu, resolution siamin an tarlang.

HBKCP chuan, Mizoram sorkar hmalakna enchhinna atan an kuhva rahte nimin khan Assam lamah phurh luh an tum a, mahse, Nagra-ah Assam police-te'n ruahmanna siam fel a la nih loh thu lo hrilhin, an lo dang a ni.

Hetih lai hian, October 30, Pathianni chawhnu lam khan Aizawl lam aṭanga Hachhek bial chhunga khaw hmasa ber Dárlâk khuaah Myanmar aṭanga lak luh ni ngeia hriat kuhva rah phur lirthei a kâng.

Mamit police hnen aṭanga Vanglaini thu dawn danin, kuhva rah phur motor pathum a kâng a, pakhat chu a kâng chhe nual hman.

Pahnih chu a battery vel a kan laiin an ṭhelh hman thung. Kâng ṭhelh turin Mamit aṭangin Fire department motor tirh a ni.