Vigilance Awareness Week pualin Aizawlah walkathon buatsaih a ni

Vigilance department leh Central YMA ṭangkawp chuan Vigilance Awareness Week 2022 hawnna atan leh eirûkna leh hlemhlêtna dona atan nimin zing khan Aizawlah kêa kal (walkathon) an buatsaih.

Walkathon-ah hian Aizawla YMA branch tin aṭangin mi pathum zel tel tura sàwm an ni a; Sikulpuikawn aṭangin YMA branch 40 aiawhte leh Chanmari kâwn aṭangin YMA branch 68 aiawhte an tel. Walkathon-a telte chu eirûkna leh hlemhlêtna dona chungchang thuin an au rual a; Vanapa Hall kawtah an intâwk khawm a ni.

Vanapa Hall kawta inkhawm buatsaihah CYMA president R Lalngheta chuan, "Ram leh hnam hmelma corruption hi mimala do hneh theih chi a ni lo a, ram mipuite'n ṭangruala do chi a ni. Kan state sorkar hian central aṭanga kan sum dâwnte hi dik tak leh fel takin a hmanna tur dik taka hman mipuite'n kan duh," a ti.

R Lalngheta chuan, ACB-in corruption case an chhui aṭangin kum 2022 chhungin thubuaiah eirua puhte thiam loh chantir an nih thu sawiin, "A lawmawm hle. Central sorkar thu angin corruption do turin Lokayukta kan din hi a lawmawm em em a ni," a ti a; Lokayukta chu hnathawk tak tak thei turin sorkarin thuam chakin, member ruat thuai se an duh thu a sawi.

Inkhawm hi CYMA vice president Lalhmachhuana'n a kaihruai a, chief vigilance officer Renu Sharma, chief secretary pawhin thu a sawi a ni.