Sorkar officer tharte hnenah CM-in appointment letter a hlân ; Kawng hrang hrangah hma kan sawn ṭan - CM

Chief minister Zoramthanga chuan nimin khan Mizoram Civil Service Combined Competitive Exam 2022-a sorkar officer tura tlingte hnenah appointment letter a hlân.

CM chuan Mizoramin kawng hrang hrangah hma a sawn ṭan thu a sawi. Appointment letter hlanna inkhawm hi Chief Ministers' Office conference hall-ah neih a ni a; October 22, 2022-a Prime Minister-in hna lak rûnpui, Rozgar Mela 2022 a tlangzarh tâk bawhzuia sorkar laipuiin state hrang hrangte ti tura a ngen angin buatsaih a ni.

CM Zoramthanga chuan, kum hnih chhung chu Covid-19 hripui lêng avangin state-te leh ram pumah sum lama harsatna a thlen a, hmalakna hrang hrang a ṭhuanawp tih sawiin, "Post ruak tam tak hnawhkhah lawk theih a ni lo. Tunah boruakin ziaawm lam panin, kawng hrang hrangah hma kan sawn ṭan a, hna lakah pawh hmasawn zel a beiseiawm," a ti a; sorkar offi cer lak tharte chu duhsakna a hlàn.

Inkhawm kaihruaitu chief secretary Dr Renu Sharma chuan, sorkar hnathawh chu hamṭhatna dawnna tur ringawt ni loin, mipui rawngbawlna a ni tih vawng reng turin offi cer tharte a chah.

Appointment letter hi Mizoram Civil Service mi offi cer 14, Mizoram Police Service officer mi pariat, Mizoram Information Service mi pali leh Mizoram Finance & Accounts Service mi pariat hnenah hlan a ni.

Inkhawmah hian Home secretary H Lalengmawia, DPAR secretary R Lalramnghaka, secretary to CM K Lalthawmmawia, Finance commissioner Vanlalchhuanga bakah, department ṭhenkhat hotute an tel a ni.