Sorkar sawiseltute leh diriamtute hi Pathian ruat pawm lotute an ni - Dr Beichhua

MNF adviser Dr K Beichhua, minister of state chuan nimin khan Mizo Hnam Rûna inkhawmah thu sawiin, sorkar sawiseltu leh diriamtute chu Pathian ruat pawm lotute an nih thu a sawi.

Dr K Beichhua chuan, MNF sorkar chu Pathianin mipui vote hmanga a ruat sorkar a nih thu sawiin, "He sorkar sawiseltute leh diriamtute hi Pathian ruat pawm lotute an ni. Chief Minister leh minister dangte thawhhona a ṭha em em a, thawhhona chungchangah sawiselna tur hria an awm lo, thiamna sang tak nei MLA-te thawhhona a ṭha em em a ni," a ti.

MNF sorkar chhunga Mizoramin harsatna chi hrang hrang a tawhte sawiin K Beichhua chuan, "Hun khirh leh harsa taka ro min rèltirtu Pathian hian hun pangngaiah ro min rèltir leh ngei ang," a ti a; hun khirh leh harsa an tawhte chu hun la awm tura Pathianin a tah hriamna a nih thu sawiin, "MNF MLA-te an bial ngaiah dinhmun ṭha lo an awm lo a, chuvangin, inthlanpui lo awm leh turah kan sorkar leh ngei dawn a ni," a ti bawk.