KHAWTHLIR

Chanmari West Branch KṬP chuan May 9, Inrinni khan Synod Hospital-ah thisen unit 36 an pe a, a petute mipa 35 leh hmeichhia pakhat an ni.

Zorikhuma (38) h/o Lawmkimi, Chawnpui, Aizawl chu May 8, 2020 chawhnu khan Tuivai luia Tlangcheng lí-ah chesualin a tla hlum. Thu dawn danin, Zorikhuma hi NE Khawdungseiah an zin a, Tuivai luiah chèngkawl khawrhin an kal a, lui hleuh kai a tumna lamah a tla hlum a ni. A ruang chu May 8 tlaiah hmuh nghal a ni.

BJP, Mizoram Pradesh hruaitu ṭhenkhatte chuan May 9, Inrinni khan Mizoram ramria duty Vairengte Hmarveng Branch YMA-te an tlawh a, hmai tuamna leh kut tihfaina an pe. Vairengte Hmarveng YMA duty-na hmun chu Silchar kawng hlui a ni a, an duty tirh aṭangin Mizorama luh rûk tum mi 50 chuang an man tawh niin an sawi. BJP hruaitute hian hmun dang eng emaw zatah ṭanpuina chi hrang hrang an pe bawk.

Siaha bialtu MLA Dr K Beichhua, Palak bialtu MLA KT Rokhaw leh Mara Autonomous District Council (MADC) chief executive member (CEM) N Zakhai te chuan tun hnai ni thum kal ta chhungin Siaha district an fang kual a; Siaha district chu ei leh bara a intodelh theih nan beihpui an thlak a, Covid-19 vangin ṭam a tlâk theih avangin ei leh bara intodelh pawimawhzia mipui an zirtir a ni.

Zuangtui local task force aṭanga Vanglaini thudawn danin, inkharkhip laiin Muanna Venga TNT hmunpuiah eitur pe engemawzat nitin an kal thin a, TNT tlawh tura insawi zingah ruihhlo ti leh zuar an awm ṭhin a ni. TNT tlawh turte chuan an veng local council lehkha  keng zel tawh se an duh thu Zuangtui LTF-te chuan an sawi.

MZP hruaitute chuan CADC chhunga Parva, Damdep leh Vaseikai khuaa Zo hnahthlakte'n inkhàrkhip laia harsatna an tawh avangin May 8, 2020 khan ei leh in turte an pe. Zo hnahthlakte harsatna siamsak lo turin an hrilh bawk niin an tarlang.

The Mizoram Commencement (Containment and Prevention of Covid-19) Ordinance, 2020 hman a nih hnuah Thenzawl khuaah hmai tuamna vuah loa khawlaia chhuak mi 42 man a ni tawh a, an pawisa chawi tlingkhawm chu Rs. 4,200 a ni. Thenzawlah hian Covid-19 Ordinance chung­chang hi May 4-6 chhung mipuiah awareness tih hmasak a ni a, chumi hnuah dan bawhchhiate man ṭan a ni. Man zingah khaw dang mi, Thenzawl paltlangte an tel thu Vantawng editor Liantluanga Renthlei chuan a sawi.

Mamit district-a sorkarin inkhung hranna tura a siam quarantine centre pathumah mi 31 dah mek an ni. Quarantine centre-a awm mekte chu Assam, Meghalaya leh Tripura aṭanga hruai hawte an ni a, mipa 18 leh hmeichhia 13 an ni.

Lawngtlai DC Shashanka Ala chuan May 8 & 9 khan Lawngtlai district khawchhak lam, Myan­mar ramri depa duty-na hmun - Tuipui dung, Archhuang kai leh Saisihchhuah-te leh a chheh­vela khaw hrang hrangte a tlawh a, Covid-19 donaa an hmalaknate a en. Khawtlang hruaitute leh Assam Rifles hotute a kâwm a; ramria duty-te hnenah pawisa leh silpauline a pe a ni.

Mizoram Bharat Scouts & Guides state headquarters Rover crew leh Ranger team-te chuan May 9-10 khan Aizawla Covid-19 hri léng vanga duty - police, traffic police leh local task force-te hnenah ei leh in tur an sem.

Aizawl Traffic SP chuan, Aizawl District Disaster Management Authority thu angin, Vaivakawn aṭanga Chanmari West pan chhohna kawngpui tawntirha in pahnih ṭhiah a nih dawn avangin, May 9, Inrinni aṭanga hna thawh chhung zawng chu ni tin zing dar 9 aṭanga tlai dar 4:30 chhunga lirthei tlân dan tur ruahmanna a siam. LMV leh two wheeler-te chho zawng chauha tlân phal a ni a, kawng sirah bungrua/lirthei dah phal a ni lo.

Khawzawl district-a National Highway no. 6 chu Tuivawl-Kawlkulh leh Khawzawl Vengthar-Champhai inkarah siam mek a nih avangin, Khawvawl DC-in lirthei tlan dan tur a ruahman. Zing dar 9 aṭanga chawhnu dar 1 inkarah leh chawhnu dar 2 aṭanga tlai dar 5 inkarah kawngpui khâr a ni dawn a, chhun dar 12 leh dar 1 inkarah tlan tlang theih a ni ang. Thupek hi May thla chhung zawng atan a ni.