Geology & Mining Ministers’ Conclave-ah Mizoram Geology & Mining Minister a tel

India hmarchhak state hrang hranga Geology and Mining minister-te intawhkhawmna hmasa ber, First North East Geology & Mining Ministers’ Conclave chu nimin khan Dimapur, Nagaland-ah neih a ni a, Mizoram Geology & Mining minister Dr R Lalthangliana a tel.

Conclave hi Mizoram Commerce & Industries (Geology & Mining) department huaihawt a ni a, Nagaland sorkarin a thleng. Dr R Lalthangliana chu convener leh chairman a ni a, Mines, Coal & Parliamentary Aff airs minister Pralhad Joshi chu khuallian niin, Nagaland chief minister Neiphiu Rio leh Assam chief minister Himanta Biswa Sarma te khualzahawm an ni.

Dr R Lalthangliana chuan, North East Mines Ministers’ Forum siam ṭhin chu a vei thu sawiin, "India ram hmun dang nen khaikhinin hmarchhak state Geology & Mining departmentte hi kan hnufûm bakah, kawng tam takah mi dang tluk tura hmalak a la ngai. Kan kut zála tla hna pawimawhte ṭha taka kan thawh theih nan budgetary allocation awmze nei zawk kan mamawh a ni," a ti.

Hmarchhak state-te dinhmun dik tak hrethiam a, harsatnate sutkian a nih theih nan leh hmarchhak hmasawnna atana kawng awlsam zawk dappui ngei turin R Lalthangliana chuan Union Minister leh Ministry of Mines hotute a ngen.

Conclave hi session hnihah ṭhen a ni a; chawhma lamah Dr R Lalthangliana kaihhruaiin hmarchhak state-a Geology & Mining minister-te chuan chawhnu lama Union Minister awm huna thu thlen turte an sawiho a; harsatna leh mamawh thuhmun an neihte la chhuakin, chawhnuah Ministry hotute hnenah an thlen a ni.

Intawhkhawmnaah hian Mizoram aṭangin Commerce & Industries secretary Esther Lalruatkimi, Geology & Mining director Lalṭhazuala, joint director H Lalbiakkima leh deputy controller of Mines Lalremmawia te an tel a; Oil and Natural Gas Corporation, Oil India, NLCIL leh CIL hotute an tel bawk.