Kawng siam danah Lunglei YMA lungawi lo Zaninah hmalak dan tur an rêl dawn

Aizawl - Thenzawl - Lunglei (ATL) kawng siamṭhat thuai phuttu YMA Sub-Headquarters, Lunglei hruaitute chuan nimin khan kawng siam dan an enfiah a, an beisei angin hmalakna an hmu lo. Hei vang hian zaninah hmalak dan tur an rél dawn.

Lunglei Sub-Hqrs. YMA hruaitute hnen aṭanga Vanglaini thu dawn danin, ATL kawng siam hna an thawhna deuh ber Sekhumah chuan hna tlemtêin kawngah lung (boulder) an lo dah a; kawnga chirh pawh thian fai hmasa loin lungte chu an dah niin a lang.

October 25, 2022 khan Lunglei YMA-te hian thuchhuah siamin, ATL kawng chhia siam tura hmalak dan October 31, 2022 thleng ngaichàn a, an duhthusama hmalakna a awm loh chuan an thiam ang anga hmalak an tum thu an tarlang a ni.

ATL kawngpui chhia siam a nih theih nan Chief Minister leh Lunglei disrict-a MLA-te an dàwr tawh a; a hnuah kawngpui tlo zawk a awm theih nana hma laksak tura ngenna lehkha Chief Minister an pe leh bawk.

An hmalakna chu a sâwt loh avang leh kawngpui a chhiat belh zel avangin, mawhphurtute koh eih a nih theih nan October 18, 2022 khan No Vehicle Day an lo puang tawh. No Vehicle Day-in awmzia a nei lo a, an beisei angin mawhphurtute aṭanga thu an dawn loh bakah, kawng siam turin bul ṭanna hmel rintlak hmuh tur a awm loah an ngai a ni.