Tuialhthei phur a chetsual chángin Oil dawh tawh lo turin mipui chah

Petrol pump neitu inzawmkhawm pawl, All Mizoram Petroleum Dealers' Association ( A M P E D A ) c h u a n , tuialhthei phur lirthei a chetsual cháng a awm leh thei tih sawiin, chu'ng hunah chuan tuialhtheite dawh tawh lo turin mipuite an chah.

AMPEDA hruaitute hian nimin khan Aizawl Press Club-ah thuthar thehdarhtute an kâwm a; an president K Lalnghakliana chuan, October 29, 2022-a Tuirial Airfield Venga tank lorry chesual a kan avanga vanduaina thleng chu pawi an tih thu a sawi a, "Vanduaina tâwkte kan lainatin, kan khawngaih khawp mai," a ti.

K Lalnghakliana chuan, tuialhthei phur a chetsualin, tuialhthei lo chuh chíng an awm ṭhin tih sawiin, "Hetiang hi tun hnuah chuan thleng tawh lo se, tun ṭum vanduaina thleng hi inzirna atan hmang ila kan duh hle," a ti a; tuialhthei chu awlsam taka kângmei tichhuak thei a nih avangin fimkhur hle a ngaih thu a sawi.

AMPEDA President chuan, petrol pump a tam zel avangin tanker pawh a tam zel thu sawiin, "Khawvel a nih miau avangin chetsualna cháng
a awm lo thei lo. Hmun dangah chuan ti mah se, vanduaina thlen laia lo chuh luih luih hi Kristian ramah chuan a mawi lo. FIR thehluh thlengin hma kan la tawh ang," a ti.

AMPEDA hruaitute sawi danin, petrol pump pawh kângmei chhuah awlsam theihna a ni; lirthei khalhtu ṭhenkhat leh an mi phurh zingah petrol pump-a me zu an awm ṭhin a, chungte chu an hau ṭhin. Tun hnuah chuan petrol pump huam chhunga mei zu chunga lutte chu tuialhthei pek an nih tawh loh tur thu an sawi a ni.

October 29, 2022-a tank lorry chesual chu a lian chi a ni a, Ramsanga Filling Station, Champhaia dah tur petrol litre 22,000 phur a ni. Petrol a phurh chu cheng nuai 20 vel man a ni a, tank lorry chu a la thar avangin cheng nuai 35-40 man vela chhût a ni bawk.