Kum 20 chhungin Kolasib district-ah HIV vei mi 1,683 hmuh chhuah a ni

Kolasib District AIDS Prevention & Control Committee chu an chairman John LT Sanga, bawrhsap kaihhruaiin nimin khan an ṭhukhawm. Kum 20 chhungin Kolasib district-ah thisen 84,519 endikna aṭangin HIV vei mi 1,683 hmuh chhuah a ni a, chu'ng zinga 56% chu mipat hmeichhiatna hman aṭanga kai an nih thu tarlan a ni.

Ṭhutkhawmah hian Mizoram State AIDS Control Society (MSACS) leh Central YMA ṭang dunin November 24, 2022-a an buatsaih tur 'Zoram Harh Rawh Campaign' bakah, HIV veite dinhmun thlir lêtna leh HIV/AIDS chungchang inzirtirna hun hman a ni.

Tarlan danin, June 2002 aṭanga September 2022 thleng khan Kolasib district-ah thisen 84,519 endik aṭangin HIV+ve mi 1,683 hmuh chhuah a ni a; a zatve aia tam chu mipat hmeichhiatna hman aṭanga kai niin, hriau thianghlim lo hman aṭanga kai 38% leh nu aṭanga kai 3% an awm bawk.

Kolasib district chu AIDS vei tamna (high prevalence) district zingah a tel mek thu te, state dang aṭanga luhka pawimawh a nih angin, HIV hrik darh zel tur ven chu ngaih pawimawh a ṭul thu leh chumi tihlawhtling tur chuan sorkar department, kohhran leh tlawmngai pawlte'n thawhhona ṭha tak an neih a pawimawh thu an sawi.

HIV/AIDS chungchang inzirtirna chu zirlaite hnenah uar zawka kalpui dan tur te, kohhran ṭhalai zinga inzirtirna ṭha zawk buatsaih dan tur te, ‘Zoram Harh Rawh Campaign’ kaltlanga Kolasib district ṭhalai tam zawkte'n HIV/AIDS laka invèn nacháng leh nun kawng dik an zawh theih nana hmalak dan turte sawiho a ni.