Kuhva hralh a nih theih nan hma la turin sorkar phût

ZPM Ṭhalai party chuan thuchhuah siamin, Hachhek bial mipuite'n hah taka an thar kuhvate harsatna awm loa an hralh theih nan hma la thuai turin MNF hruai Mizoram sorkar an phût.

Hachhek bial mipuite kuhva thar hralhna turah Assam chief minister Himanta Biswa Sarma-a'n harsatna a siam chu pawi an tih thu tarlangin ZPM ṭhalaite chuan, "Assam CM-in Mizoram kut hnathawktute laka vawiin thlenga harsatna a siam fo mai hi Mizoram sorkar MNF kaihhruai duap vangah kan ngai," an ti.

ZPM Ṭhalai chuan, "Kuhva hralhna kawnga Hachhek tlângdung MNF Joint VC hialin an mangan thu thuchhuah hmanga an aupui a ngai ta hian ngaihtuah a tithui hlein kan hria," an ti a; MNF sorkarna hnuaiah chuan ruling VC-te pawhin sorkar an au eih zo ta lo nia a lan thu an tarlang a ni.