CM-in work portfolio a chang dawn lo - Lalduhoma

ZPM leader Lalduhoma chuan, mipuiin eirûkna leh hlemhletna an duh lo tak zet a nih chuan kum 2023-a inthlanpuiah lantir a ngaih thu leh, ZPM an sorkar chuan chief minister-in works portfolio a chan dawn loh thu a sawi.

Lalduhoma hian nimin khan ZPM pisaa inkhawmah thu sawiin, tunah chuan chief minister-te'n department hmui apiang an chang zel tih sawiin, "Lui chu a hnár aṭangin a nu leh dawn tih a lang nghal vek a ni. Kan sorkarah chuan CM-in works portfolio a nei dawn lo a, hei hi kalphung thar ṭha tak tur a ni," a ti.

Party ṭhenkhat chu chief minister an nih bakah party president hna chelh kawpin, lal takin an insiam tih sawiin Duhoma chuan, "Hei hian ṭhat lohna tam tak a nei a, kan sorkarah chuan CM nih leh party president nih kawp a rem ve dawn lo," a ti a; MLA leh minister term khat chauh la nite'n in hmun leh huan zau tak tak an nei thei zel chu an hlawh aṭang ringawt neih theih a ni loh thu a sawi.

Lalduhoma chuan, eirûkna leh hlemhlêtna chungchangah kohhran leh YMA an au chhuak tawh tih sawiin, "Eirukna leh hlemhlêtna hrang hrangte kan duh lo takzet a nih chuan kum 2023 inthlanah mipuite'n kan duh lohzia kan lantir a ngai. Ramhlui zia thlak thei tawh lo,opposition an nih lai chauha piangthar ṭhinte hi kan hnâwl ngam a hun tak zet tawh," a ti.

ZPM Leader chuan, "A thlâwna sem, a thlawna dawn leh kuttling loa sum lâk chu Pathian thu kalh a ni tih sawiin, "Hetiang hmanga vote zawng ṭhinte chu ringtu kan nihna anga kan hnâwl a, kan kalsan ngam a hun ta," a ti a; sorkarna siam turin an inbuatsaih mek thu a sawi.