Ramria duty-te'n Assam mite an hnawt kîr

Vairengte Hmarveng Branch YMA hruaitute sawi danin, tun hnai khan ramri vénga an duty-naah Assam Forest mite an kal a, ramri venga duty-te hian dangin an hnawt kir.

Assam Forest mite chuan, Mizoram IR police leh Vairengte task force-te duty-na hmun chu Assam ram chhung a nih thu an rawn hrilh niin an sawi bawk.

Vairengte dai ramria duty-te Vanglaini palaiin a tlawhnaah Vairengte Hmarveng YMA president Lalmuankima chuan, an duty-na hmun High School Tuikhuah mualah Mizoram 

aṭangin IR police pahnih leh task force mi pahnih an duty ṭhin tih sawiin, "Hetianga kan duty lai hian tun hnai khan Assam aṭang­in Forest lam mi 10 rual vel chu uniform hàin an lo kal a, 'Engati nge kan ramah in rawn duty?' tiin min rawn vau a ni ber," a ti.

Assam Forest mite hnenah Mizoram IR police duty-te chuan, 'He lai hi kan ram a ni a, chuvangin sorkarin duty turin min ti a, kan duty a ni,' tia an chhàn thu sawiin Lalmuankima chuan, "Mizo IR-te hian silai an lek a, silai an lek hnuah chuan Assam mite chu an tawlh kîr ve leh ta a ni," a ti a; Assam Forest mite zingah Assam police an kal tel loh thu a sawi.

Assam Forest mite kal laia duty zinga mi Vairengte Hmarveng YMA member pakhat sawi danin, Assam mite chu beat officer-in thu a pek vanga kal an ni a, thla la tura kal an ni. Assam civil mi pakhat a tel ve a, civil mi chuan hmai a tuam. Arsi bel pahnih an tel. Mahse, Mizo IR police duty-te'n thla lâk an remtih loh avangin Assam mite chuan thla an la ta lo a ni.

YMA duty pakhat chuan, an duty-na hmun, Assam Forest mite'n Assam state chhung anga an sawi chu tun hma chuan Assam Forest-in lo vah pawh an phal lo ṭhin a, sipaite hruaiin Mizote an tibuai ṭhin. Tunah erawh chuan Vairengte lamin lo an vât a, thlaite an chìn avangin Assam sorkar lam mite an kal ngai tawh lêm lo thung.

Vairengte Hmarveng YMA President chuan, inkhàrkhip vangin Vairengte dáiah IR police 10 vel sorkarin a dah belh thu te, tunah chuan police 15 vel an awma an hriat thu te, ramri an vènnaah sorkarin a puih ṭhat avangin harsatna an tawh rih loh thute a sawi. An mamawh angin sorkarin drone camera a pek avanga an lawm thu leh mamawh dangte pawh Home Minister-in a pek tawh thu a sawi bawk.