Malsawmna tinréng lo luhna turin Zoram hi Lalpa'n min pe a ni - CM

Nimin khan Aijal Club-ah Tualte Tomato Festival khârna inkhawm buatsaih a ni a; khuallian, Horticulture enkawltu chief minister Zoramthanga chuan, malsawmna tinréng luhna turin Mizoram chu Lalpa'n a pek a nih thu a sawi.

Tualte Tomato Growers Cooperative Society chairman R Lalchhanchhuaha sawi danin, Tualte khua hian kum 2019 aṭangin tomato an chíng ṭan a, tunah chhungkaw 233-in an chíng. Tomato cheng vbc. 5.48 man an hralh tawh a, kumin bikah October thlengin cheng vbc. 2.74 man an hralh tawh. Tun hnai aṭang khan tomato ketchup an siam chhuak thar bawk.

Horticulture secretary K Lalthawmmawia kaihhruaia Tomato Festival khârna inkhawmah Chief Minister chuan, thlai thar hralhna ngaihtuah tur marketing board emaw society sorkarin din se tih a rilruah a awm len thu a sawi a, "Loneitute hian an khaw piah lamah an thlai tharte an ngaihtuah hman lo," a ti.

Zoramthanga chuan, sorkar aṭangin thlai hralhna ram chhung leh ram páwnah zawn a ṭul thu sawiin, "Zoram pumin tomato chíng ta ila, India mipui hmun 10-a ṭhena hmun khat chauh pawh kan chan chuan a ei zo tur an awm lutuk," a ti a, marketing lam chu sorkar mawh a nih thu a sawi.

Hralhna a ṭhat phawt chuan fuih ngai loin loneitute an taimâk thu sawiin CM Zorama chuan "A processing leh market tih fuh chuan 4th grade leh MR inchuh luih luih loin, a aia hlâwkah kan kal thei vek dawn. America-ah chuan sorkar hnathawk ni loin, loneitute an chapo. Chutiang chu keini pawhin kan hlat bik lo," a ti.

Chief Minister chuan, thlai sawngbawlna leh hralhna an ngaihtuah tak tak dawn nia sawiin, "Pathianin kan rama malsawmna min pekte hmang thiam turin kan thluak kan hmang ang a, kan thâ nen hma kan la ang," a ti a, Mizoram chu malsawmna tinreng luhna tura Lalpa'n a pek a nih thu a sawi.

Zoramthanga chuan, Mizoram chu economic molecule-a khat a nih thu sawiin, "Hei hi zuk activate (tichetu) an awm chuan hna ropui tak a thawk thei. Nakinah chuan kan ram hausakzia hi kan va hre tlai deuh ve kan la ti ang," a ti.

Deputy chief minister Tawnluia pawhin thu sawiin, thlai khamkhawp thar a nih chuan Silchar aṭanga a rawn luh loh tur thu a sawi a, "Kan eikhawp thar turin hma la ang u. Kan rama tharte hi keimahni ngeiin lei ila, kan ram chhungah pawisa a kual dawn a ni," tiin, hmun dang thlai lei a nihin sum tak tak state páwnah a chhuah ṭhin thu a sawi.

Deputy CM chuan, buaipui tham, buai­pui tlak, sorkar tana buaipui harsa tur khawp thar tum turin loneitute a fuih a, "Hetiang zat kan thar chuan sorkar a tlanchhe bik hauh lo ang," a ti.

Tualte Tomato Growers Cooperative Society chairman R Lalchhanchhuaha chuan, 'Sorkar aṭanga ṭanpuina dawn ni loin, keimahniin hlawhtling turin i thawk chhuak ang u,' tih chu an thupui a nih thu a sawi.

CHIEF MINISTER SAWI TLANGPUI
1) Thlai thar hralhna ngaihtuah tur marketing board emaw society sorkarin din se tih rilruah a awm lian.
2) Pathianin kan rama malsawmna min pekte hmang thiam turin kan thluak kan hmang ang.
3) Processing leh market tih fuh chuan 4th grade leh MR inchuh luih luih loin, a aia hlâwkah kan kal thei vek dawn.
4) America-ah chuan sorkar hnathawk ni loin, loneitute an chapo; chutiang chu keini pawhin kan hlat bik lo.
5) Nakinah chuan kan ram hausakzia hi kan va hre tlai deuhve kan la ti ang.