Mizorama kuhva thar hralh theih nan Union Minister-in hmalakpui a tum
Union Agriculture & Farmers Welfare minister of state Kailash Choudhary chuan Mizoram a rawn tlawh a, Mizorama loneitute'n kuhva an tharte state páwna awlsam zawka hralh a nih theih nan theihtawpa hmalak a nih tur thu a sawi.
Agriculture & Farmers Welfare Minister hian nimin khan Mamit tlawhin, Mamit DC conference hall-ah sorkar hotute nen an inkâwm a; "Loneitute'n kuhva hring an tharte Mizoram páwna awlsam zawka hralh a nih theih nan theihtawpa hmalak a ni ang," a ti.
Kailash Choudhary chuan, Aspirational District hnuaia Mamit district hmalakna ṭhenkhatah hmasawnna a thlen laiin, ṭhenkhatah a tlahniam tih sawiin, "Kan hmasawnna leh kan tlakhniamna chhante uluk taka chhui a, a takin mipuite'n an chhawr ngei em tih kan ngaihtuah chian a ngai," a ti a; thil neih ang angte a ṭangkai thei ang bera hman thiam leh rilru puthmang tihdanglam a ngaih thu a sawi.
Union Minister chuan, tun hnaiah Mamit district-a khaw 20-ah rawṭhing tâm vanga sazu puang mekin buh leh bâl tam tak an tihchhiat chu zir chiang turin Agriculture & Farmers Welfare ministry-a scientist-te Mamit district-ah a tirh tur thu a sawi a; Mamit district-a RD block pathumah FPO din a, theihtawp chhuaha hma lakpui turin sorkar hotute a chah bawk.
Agriculture & Farmers Welfare Minister hi October 31, Thawhṭanni khan a rawn thleng a, tlaiah College of Veterinary Sciences & Animal Husbandry, Selesihah Multi Technology Testing Centre (MTTC) leh Vocational Training Centre (VTC) a hawng. MTTC leh VTC hi cheng nuai 428 hmanga sak a ni.
Kailash Choudhary chuan, Mizoramah kut hnathawka eizawngte hmasawnna rahbi atan Farmers' Producer Organization (FPO) din a pawimawh thu sawiin, "Sorkar laipui chuan FPO-te'n hamṭhatna an neih nan scheme hrang hrang a nei," a ti a; loneitute'n Pradhan Mantri Kissan Nidhi Yojana hnuaia hamṭhatna an dawn theih nan hma a lak nghal tur thu leh Mizoram chu thla hnih hnuah tlawh leh a tum thu a sawi.
Union Minister hi Mizoram minister C Lalrinsanga, minister of state Dr K Beichhua leh MLA Vanlalhlana ten an ṭawiawm a ni. Minister Kailash Choudhary hian nimin khan Mizoram a chhuahsan a ni.