Vairengte - Aizawl inkar kawngpui Nov. 3, 2022 aṭangin dan a ni dawn

Vairengte leh Sairang inkar kawngpui zauhna tura ram lak neitu, zangnadawmna dawngtu turte pawl, Land Owners' Association (Vairengte-Kawnpui Package 3-6 NH 06 & 306) chuan November 3, Ningani zing dar 6 aṭangin Aizawl - Vairengte inkar NH kawngpui chu tiam chin awm loin Vairengteah an dang dawn.

Land Owners' Association hian October 24, 2022 khan zangnadawmna pe tura sorkar kar nan Vairengteah kawngpui dan an tum tawh a, Kolasib bawrhsap John LT Sanga ngenna avangin an ṭhulh. Sorkar hmalakna October 31, 2022 thleng ngaichâng turin thutlukna an siam a ni.

October 31 khan Kolasib DC nen an inkâwm leh a, sorkarin an beisei anga hma a lak loh avangin October 31-ah vêk kawngpui dang turin thutlukna an siam ta a ni.

Vanglaini palai zawhna chhangin Land Owners Association hruaitute chuan, hun rei tak chhung sorkar an ngaihchàn tawh thu an sawi a, "Kan beisei leh phût angte an ti lo. Tunah chuan kan duh rêng vang ni loin kawng dan a ngai ta a ni," an ti.

Land Owners Association hruaitute chuan, Mizo mipui leh state ṭhenawmte ngaihdan tur an dàwnin, kawng dan chu an hreh thu an sawi a, "Kan kawng dan avangin mipuiin harsatna an tâwk dawn a, hei pawh hi ṭha kan ti lo," an ti a; sorkar karna atana an hmanraw ṭha bera an ngaih avangin hreh tak chungin kawng an dang dawn niin an sawi.

Ram laka zangnadawmna dawn tur chu July 8, 2022 khan zangnadawmna buaipui tura ruat Competent Authority for Land Acquisition (CALA) (Kolasib Additional DC) account-ah thun (transfer) a nih tawh thu Land Owners' Association hruaitute chuan an sawi.

Land Owners' Association hruaitute chuan, Land Revenue & Settlement Secretary-in ṭum khat leh GAD Secretary-in ṭum hnih zangnadawmna pe chhuak tura an tih tawh thu an sawi a, "Heti chung hian vawiin thlengin pek kan la ni lo. Thil tih theih loh a nih chuan ṭha takin min hrilh mai se," an ti.

Land Owners' Association (Vairengte-Kawnpui Package 3-6 NH 06 & 306)-ah hian chhungkaw 1,735 an awm a ni.