Kuhva hralhnaa harsatnate Union Minister hnenah thlen

Hachhek bial chhunga Joint Group YMA Study Team-te chuan nimin khan Mamitah Agriculture & Farmers Welfare minister of state Kailash Choudhary an hmu a; Hachhek biala kuhva tharte ṭha taka hralh a nih theih nan hma la turin an ngen.

Hachhek bial chhunga YMA group pahnih - Taitesena Group leh Langkaih Group hnuaia Study Team-te chuan, Mizorama thar kuhvate hlâwk zawk leh mumal zawka an hralh theih dan turte an thlen a; Hachhek bialah kuhva tam tak an thar laiin, a sawngbawlna an neih loh thute an hrilh bawk.

Minister Kailash Choudhary chuan, Mizoram kuhva tharte ṭha taka hralh a nih theih nan Home minister Amit Shah a lo sawipui tur thu te, Assam sorkar leh Mizoram sorkar pawh sawipui a tum thute a lo hrilh a; central aṭangin kuhva sawngbawlna tur ngaihtuahpui an nih tur thu a sawi bakah, Farmers Producer Organisation (FPO) lo din turin a chah.