Pum damdawi lâr Pantop-D SR ṭha leh ṭha lo sawifiah

Health & Family Welfare hnuaia Food & Drugs Administration (FDA) chuan, Pantop-D SR batch no. - SPM211927, Mfg. Date - Dec.2021, Exp. Date - Nov.2023 chu a nih tur ang tling lo leh ṭha tawk lo a nih thu leh, Pantop-D SR dang, batch number dangte erawh chu hlauhthawnna tur a awm loh thu an tarlang.

Mizote'n pum lam damdawi an hriat lâr, ARISTO Pharmaceuticals Ltd., Sikkim siam chu R Vanlalruata, assistant director (FD)-in a ngen angin Regional Drug Testing Laborratory, Guwahati-ah endik a ni a; October 28, 2022-ah RDTL, Guwahati chuan, Pantop-D SR chu a ṭha tâwk lo (not of standard quality) tih a tarlang a ni.

Pantop-D SR damdawi chungchangah FDA chuan thuchhuah siamin, tun hnaia Pantop-D SR endikna report-ah a ṭha tâwk lo tia tarlan a ni chuan mipui a tichî-âi hle tih hriat an tarlang a, "Pantop-D SR endik hi batch no. - SPM211927, Mfg. Date - Dec.2021, Exp. Date - Nov.2023 a ni a, label-a a lan dan chuan, a chhungah Pantoprazole 40 mg (20 mg mum hnih) leh Domperidone pellets 30mg awm tur a ni. Endikna report chuan heng damdawi chi hnihte hi a awm lo ve ve a ti a, chuvang chuan quality ṭha lo/tling lo tih a ni ta a ni," an ti.

Endikna report avangin Pantop-D SR zawng zawng a ṭha lo vek anga ngaih tur a ni lo tih tarlangin FDA chuan, "Batch number tarlan ang púte chauh 'ṭha lo/tling lo' tih hian a kâwk," an ti a; Pantop-D SR ei mek tan batch number dang a nih chuan hlauhthawn tur a awm loh thu an tarlang.

FDA chuan, ARISTO Pharmaceuticals-ah a ṭul anga hmalak nghal a nih thu sawiin, an siam ngei a nih leh nih loh hriat thuai beisei a nih thu an tarlang a; FDA-in damdawi chi hrang hrang quality ṭhat leh ṭhat loh an endik reng thu leh, damdawi zawrh tura lâkah damdawi zuartute an fimkhur a ṭul thute an tarlang bawk.