Zemabawk LC inthlan buatsaih loh chungchang ECI-ah thlen a ni

Zemabawk Local Council ṭhiah tawhah danin a sawi hun tiam chhunga inthlan (by-election) buatsaih a nih loh avangin ZPM Ṭhalai president leh AMC councillor Malsawmzuala Ralte chuan tun hnai khan Election Commission of India (ECI)-ah ziakin thu a thlen a; hma la tura a ngenna chu October 31, 2022 khan ECI-in a rawn chháng.

ZPM Ṭhalai thu­chhuah tarlan danin, Zemabawk LC chu August 16, 2022 khan sorkarin a ṭhiat a, Ward Committee leh Local Council Rules 2010 (as amended in 2020)-in a sawi angin, LC ṭhiah a nih chuan, ṭhiah aṭanga ni 60 chhungin inthlan buatsaih tur a ni.

Hetih lai hian, Ze­ma­bawk LC ṭhiah a nih aṭanga ni 60 ral hnu leh ni 70 chuang a ral hnuah pawh by-election buatsaih a ni lo tih sawiin ZPM Ṭhalai chuan, "Pu Malsawmzuala Ralte, ZPM Ṭhalai president chuan hemi chungchang hi ECI-ah ziaka thlenin, a rang lama inthlan buatsaih tura hma la turin a ngen a ni," an ti a; ngenna chu October 31, 2022 khan ECI-in a rawn chháng a, State Election Commission an sawipui tur thu an rawn hrilh tih an tarlang.

ZPM ṭhalaite chuan, "MNF kaihhruai Mizo­ram sorkar hian mahni inrintâwkna a tlachham hle a ni tih Chief Minister bial Zemabawk LC leh Lunglei Municipal Council inthlan a huai­hawt ngam loh aṭang hian chiang takin a hriat a ni," an ti.