Ṭha taka hna thawk zo thuai turin Lunglei DC-in Bhavya hotute a hrilh

Aizawl-Thenzawl-Lunglei (ATL) World Bank kawnga Kanghmun leh Lunglei inkar kawngpui chhia thawm ṭhat chungchangah nimin khan Lunglei DC Kulothunga A hoin sorkar hotu te, páwl hrang hrang leh kawng siamtu Bhavya Constructions aiawhte an ṭhukhawm. Bawrhsap chuan Bhavya Constructions aiawhte chu an hnathawh a ṭhat tâwk loh thu leh ṭha taka hna thawk zo thuai turin a hrilh.

Kanghmun leh Lunglei inkar kawng chungchangah hian September 26, 2022 khan Lunglei DC pisaah ṭhutkhawm a ni tawh a, chumi ṭum chuan Bhavya Construction hotute chuan kumin October thla ral hma ngeiin thawm ṭhat hna thawh zawh an intiam a ni. Mahse, an intiam hun chhungah an siam zo hman lo a, defect liability period chu March 31, 2023 thleng a nung.

Kulothungan A chuan, Bhavya Construction-te hnathawh leh an hmalaknate a ṭhat tâwk loh thu sawiin, kawng thawm ṭhat hna chu zawh thuai a nih theih nan chak taka hma la turin a hriattir a; hnathawh kal mek chu uluk taka enfiah tur leh a ṭul anga na taka nawr turin PWD hotute a chah bawk.

Kawng chhia avangin chhimlam mipuite'n harsatna nasa tak an tawh thu sawiin Bawrhsap chuan, "District administration chuan mipui himna a dah pawimawh hmasa ber a, kawng chhiat vanga tawhsual tâwk palh an awm a hlauhawm. In hmalakna hi zo thuai ang che u," a ti.

YMA Sub-Headquarters, Lunglei hruaitute chuan an president Lalrotluanga hoin nimin khan Lunglei aṭanga Sekhum dái thleng kawng siam hna thawh dan an enfiah a; kawng chhia thawm ṭhat hna thawh mek chu duhthu a sàm loh thu an sawi. YMA hruaitute chu hma an lak zel dan tur ngaihtuahin nizan khan an ṭhukhawm a ni.

October 28, 2022 khan Lunglei Sub-Hqrs YMA conference hall-ah PWD chief engineer (P) Lalrinkima Hnamte hoin kawng chungchanga sawiho a lo ni tawh a; PWD hotute chuan Bhavya Construction chu December 20, 2022 hma ngeia hna thawk zo tur leh labour 14 thawk mek bakah, mi 20-30 lak belh turin an hriattir. November 5, 2022 ral hmaa hmalakna thar hmuh a nih loh chuan Bhavya Construction security deposit hmangin hna thawh a nih tur thu PWD superintending engineer Lalthanzuala chuan a sawi.

Nimina ṭhutkhawmah hian Lunglei SP Rex Zarzoliana Vanchhawng, PWD SE Lalthanzuala, YMA Sub-Hqrs president Lalrotluanga, Lunglei MJA president Laltlanthanga, MHIP president Lalliannguri leh Bhavya Construction project manager Horendra Kumar Barua leh mi pawimawh dangte an tel a ni.