Mipui hriselna ngai pawimawh Duh loah Mizoram sorkar puh

BJP, Mizoram Pradesh thupuangtu Lalremsangi Fanai chuan nimin khan Aizawl Press Club-ah thuthar thehdarhtute a kâwm a; Mizoram health care scheme a tluchhia nia sawiin, mipui hriselna ngai pawimawh duh loah Mizoram sorkar a puh.

Lalremsangi Fanai chuan, khawvel sorkar zawng zawngin an ngaih pawimawh ber chu mipui hriselna a nih thu sawiin, "Mipui hriselna ngai pawimawh duh lo sorkar hnuaiah Mizoram health care scheme a tluchhia. Chutih laiin, India ramah khawvela health care scheme lian ber AB-PMJAY healthcare scheme kalpui a ni," a ti.

Lalremsangi sawi danin, AB-PMJAY hnuai­­ah Mizorama chhung­kua 2,26,147 aṭangin chhungkua 1,94,859 an inziak lut thei a, chhungkaw tam zawk ziah luh an ni lo a, inziah luh nacháng hre lo an la tam hle a, inziak lut thei zinga a zatve pawh an la inziak lut lo.

Mizoramah Prime Minister Healthcare Scheme chhawr an tlem chhan sawiin Lalremsangi chuan, "Kan state sorkarin mi harsate a ngaihsak loh vang a ni. MNF sorkarin Mizoram State Healthcare Scheme (MSHCS) a kalpui a, damlote leh damdawi-inte hnena inenkawlna senso a bá tam lutuk," a ti.

Lalremsangi Fanai chuan, MSHCS-a inziak lut chhungkua 39,505-te sum thawh khawm chu Rs 7,12,37,000 a nih thu sawiin, "Mipui thawh khawm hi khawiah nge an luan raltir tih hi zawhna lian tak a ni," a ti a; Mizoram sorkar kalphung leh mipui dinhmun chu en chian a ṭul thu a sawi.

Mipui leiba tipung tura loan hmanga health care enkawl tum chu mipui zahlohna a nih thu te, contract leh thil dangah sum harsatna sawi si loin MSHCS kalpuinaah Chief Minister leh Health Minister ten phat mawina an zawng reng chu zahthlak a tih thute Lalremsangi chuan a sawi bawk.