Mizorama kuhva hralhna tura harsatna Sukiang turin ZPM-in sorkar an phût

ZPM party chuan thuchhuah siamin, Hachhek bial chhunga khaw hrang hranga kuhva thartute'n a hralhna turah harsatna an tâwk chu pawi an tih thu an tarlang a, Hachhek biala kuhva thartute harsatna tawh chu chinfelsak thuai turin Mizoram sorkar an phût.

Hachhek biala kuhva tharte hralhna kawnga harsatna chinfelsak turin kuhva chíngtu pawl hruaitute'n Chief Minister an hmu tawh tih sawiin ZPM chuan, "Vawiin thlenga harsatna an la tâwk leh lungawi loh lantir hial ngaia an awm hi a pawi hle. Mipui thawhrim rah hralhna ngaihtuahsak chu sawi loh, phurh chhuahna kawnga an harsatna takngial pawh chingfel thei lo sorkar neih hi a manganthlak tak zet, " an ti a, kut hnathawktute ngaihsak lohzia lannaa an ngaih thu an tarlang.

ZPM party chuan, Hachhek Bial Kuhva Chingtu Pawl bakah, Hachhek biala VC-te leh pawl dangte huaihawta November 1, 2022 aṭanga Hachhek bial mipuiin lungawi lohna an lantir a ngai ta chu pawi an tih thu sawiin, "Kut hnathawktute'n harsatna naménlo an tawh mek lai hian kan sorkar pawhin maimitchhìnsan loin, dan hnuaiah rorelna fel tak kengkawh a, an harsatnate a rang thei ang bera sukiang turin kan phût a ni," an ti.

Mizorama thar kuhva hralh theih a nih loh laia October 31, 2022 thlenga ram dang kuhva tawlhruk ni ngeia hriat hmuh a la ni chu mak an tih thu leh sorkar checkgate eng emaw zat paltlanga Hachhek bial a la thleng thei chu dan kengkawhtute'n an haider lui ngei nia a lan avangin mak an tih tak zet thu ZPM chuan an tarlang.

Kut hnathawktute hmasawnna chu ZPM ngaih pawimawh ber a ni tih sawiin ZPM party chuan, "Pathian leh mipui zara sorkarna kan siam a nih chuan, hnam zahawm kan nih theihna turin ei leh bara kan intodelh ngei theih nan hma kan la dawn a ni," an ti.