Mizoramin thawnchhuah tur ṭhahnem tak a neih thu K Vanlalvena'n Parliament Committee-ah a sawi

Parliamentary Standing Committee on Commerce chu October 31, Thawhṭanni khan an chairman Dr Abhishek Manu Singhvi hoin Parliament House Committee Room-ah an ṭhu a; member atana ruat thar Rajya Sabha MP K Vanlalvena pawh a tel.

Ṭhutkhawmah hian Foreign Trade leh State Trading chungchang sawiho a ni a; MP K Vanlalvena chuan, Mizoramin agriculture, horticulture, forest, sericulture, puantah, kut themthiamna, fu leh mau aṭang thil siam thawh chhuah tur ṭhahnem tak a neih thu a sawi.

K Vanlalvena chuan, Bangladesh leh Mizoram inkalpawhna chu kum 75 khâr a nih tawh avangin sumdawnnain a tawrh thu a sawi a, "Myanmar ram buaina avangin sumdawnna lamah Mizoramin harsatna a tâwk nasa a, Mizoram economy atan Mizoram khawthlang lam ramria awm Kawrpuichhuaha Indo-Bangla Trade Centre peih thuai a pawimawh," a ti.

Rajya Sabha MP chuan, tun hnaiah UAE Embassy-a tlawh thu leh UAE Ambassador hnenah Mizorama thlai chi hrang hrang tharte UAE-a thawn dan tur a sawipui thu a sawi a; Mizoram aṭanga Arabia ramahte bungrua thawn a nih theih nan bungraw phur rél service regular tak leh bungraw phur thlawhna service Mizoramin a mamawh thu a sawi bawk.