October 2022-ah hripui vei 364, Chhuahtir 476, thihpui 3 an awm

Kumin October thla chhung khan Mizoramah Covid-19 vei mi 364 hmuh chhuah a ni a, September 2022-a hmuh chhuah 1,268 aiin 904-in a tlem zawk. October-ah vêk hripui vei dam tawh mi 476 chhuahtir an ni a, hripui vangin mi pathum an thi.

IDSP, Mizoram chhinchhiah danin, October 2022 chhunga Covid-19 positive hmuh chhuah mi 364 chu chawhrualin ni tin mi 11 chuang hret (11.74) an awm ang a ni a, September-ah chuan mi 42 chuang hret awm ang a ni thung.

October thlaa positivity rate chawhrual chu 7% a ni a, thla hmasa lam aiin a hniam zawk hle. Positivity rate hi kumin January-ah 19.75%, February-ah 25.16%, March-ah 15.27%, April-ah 12.74%, May-ah 9.06%, June-ah 10.87%, July-ah 24.18%, August-ah 22.82% leh September-ah 10.19% a ni.

Hripui vei dam tawh October thlaa chhuahtir zat chu mi 476 an ni a, positive hmuh zat 364 aiin 112-in a tam zawk.

Kumin 2022-ah January aṭanga September thla thlengin swab sample 4,80,970 endik niin, chu'ng zinga mi 97,145 chu Covid-19 positive an ni a; hripui vei dama chhuahtir mi 98,563 an awm laiin, mi 181 an thi tawh thung.