Covid-19 vei an tlem tial tial

October 31, Thawh-ṭanni khan Mizoramah Covid-19 vei mi paruk hmuh chhuah a ni. Nimin khan hripui vei dam tawh mi pasarih chhuahtir an ni a, nimin tlai khan hripui vei enkawl mek mi 33 awmin, an tlem tial tial.

IDSP aṭanga thu dawn danin, Thawhṭannia Covid-19 positive hmuh chhuahte chu Lunglei leh Saitual district-ah mi pahnih ve ve leh, Aizawl leh Khawzawl district-ah mi pakhat ve ve an ni a; swab sample 156 endik aṭanga positivity rate chu 3.85% a ni.

Mizoramah swab sample 19,88,178 endik tawh niin, Covid-19 vei 2,38,810 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,051 (99.68%) chhuahtir an ni tawh a, mi 726 (0.30%) thi tawhin, enkawl mek mi 33 (0.02%) an awm.

Nimin tlai dinhmun angin, Mizorama district 11 zinga district panga - Siaha, Kolasib, Lawngtlai, Mamit leh Hnahthial district-ahte Covid-19 vei an awm tawh rih lo a ni.