KHAWTHLIR

Lui humhalh
YMA, Chaltlang Branch chuan thuchhuah siamin, Bungmual, Mualkhuang leh a chhehvela lui luang hrang hrang - Chhimluang hnai, Chaltlang lui leh Bûng luite bakah, ram pahnih chhunga kawr zawng zawng humhalh a nih thu an tarlang a; humhalhpui tur leh dan loa luia nungchate man tum lo turin mi tin an ngen a ni.

Nungcha man khap
Lunglei DC Kulothungan A chuan, kumin October 10 aṭanga December 18 thlengin Lunglei district-ah nghalim, nghadawl, chakai, chengkawl leh kaikuang man, tihhlum, an chenna leh nunphung tihbuai khap a nih thu a puang. Thupek bawhchhiate chu thla thum chhung tàntir emaw, Rs 5,000 chawitir emaw, a pahnih emawa hrem theih a ni.

SRDC-ah hlân
Social Welfare & Tribal Affairs department-in Ngopaa Youth Development Centre an sak chu nimin khan Social Welfare & Tribal Affairs minister Dr K Beichhua'n Sialkal Range Development Council kutah a hlân. Youth Development Centre sakna atan hian Social Welfare & Tribal Affairs department chuan Ministry of Tribal Affairs aṭangin cheng nuai 100 an hmu a ni.

HCDC-in thláwp
Hachhek Constituency Development Committee chuan thuchhuah siamin, Hachhek Bial Kuhva Chingtu Pawl-in an kuhva tharte hralh kawnga harsatna an tawh mek avang leh Mizoram leh Assam sorkar aṭanga hmalakna an dawn loh avanga lungawi lohna an lantir mek chu an thlàwp thu an tarlang a, "A ṭul ang zela puih kan inhuam a ni," an ti.

PC Party-in tlawh
Peoples' Conference party hruaitute chuan nimin khan Bairabi Hydel Project ṭhin hmun an tlawh. PC president Vanlalruata chuan, PC sorkar laia hmalakna ṭha party dang sorkarte'n an ngaihsak duh lo chuan an rilru a tihnat thu a sawi.PC party chuan, Bairabi Project bul ṭan a nih laia lei verhte chu hmuh theih a ni tawh lo tih an tarlang.