Hmuh leh chibai tum lo turin ngen

SRH hotute chuan, Covid-19 vei enkawl dam tâk Rev. VL Hruaia Khiangte chu Covid-19 a vei tawh loh avangin mi dang tan en hran leh ṭih chhan tur a awm loh thu an sawi a; chutih rualin, amah lawmpui vanga hmuh leh chibai tum te, a taksa khawih khera ṭawngṭaisak tum te, an ina tlawh kher tumte tih rih loh tur a nih thu an sawi.

State Referral Hospital medical supe­rintendent Dr HC Laldina chuan media-in an kawmnaah, Rev. VL Hruaia a dam ta chu an lawmpui thu a sawi a, "ICU-ah ventilator-te leh treatment chi hrang hrang harsa tak paltlangin dam taka damdawi-in aṭanga a chhuak thei ta hi kan lawm hle. He laia thawktu zawng zawngte'n theihtawp an chhuah bakah, Zoram mipuite'n nasa taka an ṭawngṭaipuina Pathianin a chhanna a ni," a ti.

Dr HC Laldina chuan, mi dang ang bawkin Rev. VL Hruaia leh a chhungte pawh Covid-19 hripui lakah fimkhur reng tur a nih thu sawiin, "Pu Hruaia hi in lamah kar hnih chhung la quarantine rih tur a ni a, mi dangin tlawhpawh lo thei ang ber leh amah hmuha chibai emaw tih loh hrâm hrâm ni se," a ti a; Mizoram mipuite chu a hmaa fimkhurna tura mipui zirtir ṭhin zawng zawngte chu ngai pawimawha la kalpui zel turin a ngen a ni.