Sorkar hnathawkte an duhna hmuna Awm tura lak an ni lo - Chief Minister

Chief minister Lal Thanhawla chuan nimin khan Serchhip AOC Venga District Education Complex a hawng. Chief Minister chuan, sorkar hnathawkte chu anmahni duhna hmuna thawk tura lak an nih loh thu a sawi.

Mahni duhna hmun apianga hna thawh tum sorkar hnathawk an awm ṭhin chu sorkar tan a buaithlak ṭhin thu sawiin Lal Thanhawla chuan, "Mipui tan harsatna lian tak a lo awm phah ṭhin. Sorkar hnathawkte hian mahni duhna hmuna hna thawk tura lak an ni lo tih an hriat a ngai. Ram hruaitute chu mipui chhiahhlawh an ni a, sorkar hnathawkte pawh sorkar mi chhawr leh sorkar duh dana mipui rawngbawltu an ni tih kan hriat thar a ngai," a ti.

CM Lal Thanhawla chuan, sorkarin hmasawn tumin hmalakna hrang hrang leh hmachhawp a nei ṭeuh a, a innghahna bul chu zirna a nih thu sawiin, "Mithiam leh khua leh tui ṭha chherchhuah chu hna hmasa a ni. Ṭhangtharte'n rualel nacháng an hriatna tur leh all India service, central service, sipai leh service ṭha zawkahte luh an theih nan zirtirtute'n kawng an kawhhmuh a pawimawh hle," a ti a; nasa zawka ṭan lak a nih loh chuan nakin lawkah hnam dangte chu sorkar hna pawimawh ber ber chelhtute an nih tur thu a sawi.

Zirlai ni mekte'n rualel nacháng an hriat a ngai tak zet tih sawiin Chief Minister chuan, "Mi dang el pha tur chuan ṭawng thiam tam a pawimawh a, Hindi leh English nâl taka ṭawng thiam lo tan hna thawh tur a awm tawh lo. Inchei dan phung hriat, hawihâwmna leh hnam dangte khawsak phung hriat leh nun inuluk a pawimawh tih hriat tel pawh a pawimawh hle a ni," a ti.

School Education minister H Rohluna pawhin thu sawiin, office thar luahtute chu thinlung thar nen an hna phûr taka thawk tur leh anmahni dawrtu mipui leh zirtirtute tan hawihhâwma ṭhat chhuah turin a chah a, "Zirnaah hlawhtlinna a awm theih nan zirtitute bakah khawtlang hruaitu, nu leh pate thlenga zirlaite tan an thawhho vek a ngai," a ti a; zirna pawimawhna sorkarin a hriat avangin zirna-in leh educational infrastructure tam tak buatsaih a nih thu a sawi.

Serchhip District Education Complex hi Special Central Assistance sum cheng nuai 122 sênga sak a ni a; chhawng lía sang niin, building zau zawng chu sq.ft. 5,112.136 a ni.